«Elbasymen birge - birtutas ulttyń kemel keleshegine!» atty patrıottyq tárbıe sabaqtary ótkizildi
Osy shara aıasynda Ulttyq ulan Bas qolbasshylyǵynyń jáne jergilikti jerlerdegi áskerı bólimderiniń jaýapty ofıtserleri, ásker ardagerleri men jaýyngerlik qyzmettiń úzdik áskerı qyzmetshileri bilim ordalaryna arnaıy bardy.
Tárbıe jáne áleýmettik-quqyqtyq jumystar bas basqarmasynyń bastyǵy polkovnık Saverdın Imırov bastaǵan top Astana qalasynda ornalasqan №10 mektep-gımnazııasynyń oqýshylarymen «Prezıdent jaıly syr» atty kezdesý ótkizdi. Atalmysh shara oqýshy jastarǵa Qazaq eliniń memlekettiligin bekemdep, táýelsizdigin baıandy etý jolyndaǵy Qazaqstan Respýblıkasy Tuńǵysh Prezıdentiniń tarıhı róli men erkin elimizdiń jarqyn bolashaǵyn uǵyndyrýǵa arnalǵan. Shara barysynda oqýshylarmen Otan, patrıotızm, Elbasy, Otan qorǵaýshy, týǵan jerge degen súıispenshilik, azamattyq borysh syndy qasterli uǵymdar jóninde áńgime órbidi. Balalar oı-pikirlerin ashyq aıtyp, suraqtaryna jaýap alyp, belsendilik tanytty. Olar elge degen mahabbattary sheksiz ekenin kórsetti.
Tárbıe saǵatynda balalarǵa Ult kóshbasshysynyń ómir jáne eńbek jolyn baıandaıtyn beınerolık, Ulttyq ulannyń atqaratyn qyzmeti jaıly beıneklıp kórsetildi. Beıneklıptegi bas keıipkerdiń sábı kúnin somdaǵan 2 «v» synyp oqýshysy Temirjan Arsenge Ulttyq ulannyń Bas qolbasshysy general-leıtenant Rýslan Jaqsylyqovtyń atynan madaqtama qaǵazy tabystaldy. Oqýshylar da óz tarapynan patrıottyq taqyryp tóńireginde daıyndalǵan kontserttik baǵdarlamalaryn usyndy, dep habarlaıdy Ulttyq ulannyń baspasóz qyzmeti.