Elbasyǵa hat jazǵan JOO túlegi partııa qataryna alyndy
Ýnıversıtet rektory Talǵat Nárikbaevtyń aıtýynsha, sybaılas jemqorlyqqa alyp kelýi múmkin jaǵdaılardy azaıtý maqsatynda búginde oqý ornyndaǵy barlyq qyzmet onlaın túrde kórsetiledi.
«2014 jyly biz stýdentterge «bir tereze» qaǵıdaty boıynsha qyzmet túrlerin alýǵa múmkindik beretin ortalyq ashtyq. Bul baǵyttaǵy jumystardy odan ary jalǵastyryp, qazir barlyq qyzmetti elektrondy túrde kórsetemiz. Sáıkesinshe, ákimshilik shyǵyndar qysqardy, qosymsha alańdar bosap, ol jerden qazirgi zamanǵa saı kovorkıng-ortalyq ashtyq. Sondaı-aq biz arnaıy mobıldik qosymsha ázirledik. Onyń kómegimen stýdent jataqhana alýǵa ótinish bildirýge, oqý qunyn esepteýge, edvaızerden keńes alý úshin jazylýǵa múmkindik alady», – dedi rektor.
Jastarmen júzdesý barysynda Baýyrjan Baıbek Sybaılas jemqorlyqqa qarsy is-qımyl baǵdarlamasynyń jáne Elbasy- «Nur Otan» partııasynyń Tóraǵasy Nursultan Nazarbaevtyń bastamasymen qolǵa alynǵan partııa qyzmetin qaıta jandandyrýǵa qatysty júzege asyp jatqan jumys barysy týraly aıtty. Zań ýnıversıtetiniń stýdentterimen birge Memleket basshysy Qasym-Jomart Toqaevtyń Qazaqstan halqyna Joldaýynda kórsetilgen sot jáne quqyqqorǵaý júıelerindegi reformalar, sybaılas jemqorlyqpen júıeli túrde kúresý, azamattardyń quqyqtaryn qorǵaýdy qamtamasyz etý jáne taǵy basqasy talqylandy.
«Tsıfrlandyrý – sybaılas jemqorlyqpen kúresýdiń jáne ony joıýdyń, jarııalylyq pen kórsetiletin qyzmetterdiń sapasyn arttyrýdyń mańyzdy quraldarynyń biri. Búgingi tańda bul ýnıversıtette stýdentterge oqytýshylardy ózderi tańdaýǵa, olardyń jumysyn jasyryn túrde baǵalaýǵa jaǵdaı jasalǵan. Bul óte mańyzdy. Óıtkeni, jastar ózderiniń árbir isi úshin jaýapkershilikti sezinýi tıis. Biz joǵary oqý oryndaryndaǵy sybaılas jemqorlyqqa qarsy is-qımyldarǵa aıryqsha mán berip otyrmyz. Sebebi, eger adam jas kezinen bastap ádiletsizdik kóretin bolsa, onyń ómirge degen kózqarasy durys qalyptaspaıdy», – dedi Baýyrjan Baıbek. Kezdesý sońynda «Nur Otan» partııasy Tóraǵasynyń birinshi orynbasary ýnıversıtet rektory Talǵat Nárikbaev pen óziniń «Nur Otan»-nyń qataryna ótkisi keletini týraly Elbasy Nursultan Nazarbaevqa hat jazǵan osy oqý ornynyń túlegi Erlan Tólegenovke partııalyq bıletti tabys etti.