Elbasy jyl qorytyndysy boıynsha otandyq BAQ ókilderimen kezdesti

ASTANA. QazAqparat - Nursultan Nazarbaev jyl qorytyndysy boıynsha otandyq buqaralyq aqparat quraldarynyń ókilderimen kezdesti, dep habarlady Aqordanyń baspasóz qyzmeti.

Memleket basshysy suhbat barysynda bıyl elimizde ótken sharalardy qorytyndylap, jýrnalısterdiń meılinshe ózekti saýaldaryna jaýap berdi.

Atap aıtqanda, Qazaqstan Prezıdenti Astanada ótken «EKSPO-2017» mamandandyrylǵan kórmesine qatysty suraqtarǵa jaýap berip, jýrnalısterge bul is-shara el ekonomıkasyna mýltıplıkatıvtik turǵydan oń áser etkenin aıtty.

Elbasy eńbek mıgratsııasy, «jasyl» ekonomıka qaǵıdattaryn engizý jáne «Tsıfrlyq Qazaqstan» baǵdarlamasyn iske asyrý máselelerine erekshe toqtaldy.

Nursultan Nazarbaev qoǵamdyq sanany jańǵyrtýdyń jáne qazaq tilin latyn qarpine kóshirýdiń mańyzdylyǵyn atap ótip, «Qazaqstandaǵy 100 jańa esim» jobasyn iske asyrýdyń nátıjeleri jóninde oı bólisti.

Kezdesý barysynda Memleket basshysynyń jeke tulǵasyna qatysty saýaldar da qoıyldy.

Suhbattyń televızııalyq nusqasy 2017 jylǵy 25 jeltoqsanda respýblıkalyq telearnalar arqyly kórsetiletin bolady.