Elbasy «Jibek joly» bastamasynyń 5 jyldyǵyna oraı Qytaımen telekópir ótkizýdi usyndy

BEIJІŃ. QazAqparat - «Jibek joly» ekonomıkalyq beldeýi bastamasynyń 5 jyldyǵyn telekópir arqyly ózara forýmmen atap ótken jón.  Qytaıǵa memlekettik saparmen kelgen Qazaqstan Prezıdenti Nursultan Nazarbaev  QHR Tóraǵasy Sı Tszınpınmen keńeıtilgen quramdaǵy kelissóz barysynda osyndaı usynys jasady, dep habarlaıdy QazAqparat tilshisi.

«Búginde Qytaı Qazaqstannyń iri syrtqy saýda seriktesi sanalady. Ótken jyly ózara taýar aınalymynyń kólemi 11 mlrd dollarǵa jýyqtady. Degenmen, qytaılyq statıstıkaǵa sáıkes - 18 mlrd dollar. Qalaı desek te, kez kelgen san jaqsy. Sebebi bul 30 paıyzdan astamǵa ósimdi quraıdy», - dep atap ótti Qazaqstan Prezıdenti.

Memleket basshysy Qazaqstan men Qytaı yntymaqtastyǵyn damytý úshin munan ary da áleýettiń jetkilikti ekenin basa aıtty.

«Birinshi toqsannyń ózinde ǵana taýar aınalymy 2,5 mlrd dollardy qurap, ósim 16 paıyzǵa jetti. Qytaıdyń EAEO-men qol qoıǵan kelisimi munan da úlken múmkinshilik beredi. Bizdiń tabysty yntymaqtastyǵymyz Siz 2013 jyldyń 7 qyrkúıeginde Astanadaǵy bizdiń halyqaralyq ýnıversıtetimizdiń qabyrǵasynda alǵash ret jarııa etken «Jibek joly» ekonomıkalyq beldeýin qurý bastamańyzdy júzege asyrý aıasynda odan ary nyǵaıa tústi. Aǵymdaǵy jyly oǵan 5 jyl ótedi. Osyǵan baılanysty bul datany telekópir arqyly ózara forýmmen atap ótken jón sııaqty», - dedi Nursultan Nazarbaev.

Aıta keteıik, Elbasy Nursultan Nazarbaev Qytaıǵa memlekettik sapary aıasynda 10 maýsym kúni Tsındao qalasynda ótetin Shanhaı yntymaqtastyq uıymyna múshe memleketter basshylarynyń keńesine qatysady dep kútilýde.