Elbasy Japonııa Parlamentinde TMD elderi prezıdentteri arasynan tuńǵysh bolyp sóz sóıledi

TOKIO. QazAqparat - QR Prezıdenti Nursultan Nazarbaev Japonııaǵa resmı sapary aıasynda atalǵan eldiń Parlamentinde bolyp, sóz sóıledi. Bul Kúnshyǵys eli Parlamentiniń 25 jyldyq tarıhynda TMD elderi Prezıdentiniń tuńǵysh sóz sóıleýi, dep habarlaıdy QazAqparattyń arnaýly tilshisi Tokıodan.

«Sizderdiń elderińizdiń zań shyǵarý jıyndaryńyz halyq bıliginiń tereń tarıhı dástúrine ıe ári eldiń demokratııalyq tabysty damýyna negizgi úles qosyp keledi. Búginde Japonııa kóshbasy orynda, bul eldiń ekonomıkasy álemdegi úshinshi ekonomıka sanalady», - dep atap ótti Memleket basshysy.

Elbasy japondyqtardyń «kaıdzen» fılosofııasy basqarý jáne tehnologııalyq bıiktikterdi baǵyndyrýǵa múmkindik berip qana qoımaı, jalpy adamı qundylyqtar qorjynyna myǵym enip otyrǵanyn atap ótti.

«Japon halqynyń oılaý obrazy qazaqtardyń dúnıetanymymen úndes keletindigin atap ótkim keledi. Bizdi halyqtarymyzdyń qıyn taǵdyry biriktiredi. Qazaqstan men Japonııa jappaı qyryp-joıý qarýynyń qýatyn bastan keshirgen», - dedi Qazaqstan Prezıdenti.

Osy oraı Memleket basshysy Qazaqstan tarapynyń halyqaralyq qaýipsizdikti nyǵaıtý salasynda qabyldaǵan naqty sharalaryna toqtalyp, ıadrolyq qaterden azat álem qurýǵa baǵyttalǵan birlesken kúsh-jigerdiń mańyzdylyǵyn atap ótti.

«Bizderge jahandyq antııadrolyq qozǵalys qurý mańyzdy mindet kórinedi. Biz usynǵan «ATOM» jobasy dál osy maqsatty kózdeıdi. Japondyq dostarymyzdy osynaý bastamaǵa qoldaý kórsetýge shaqyramyz. Qazaqstannyń bastamasy boıynsha BUU Bas Assambleıasy 2015 jyldyń 7 jeltoqsanynda ıadrolyq qarýdan azat álem qurý týraly jalpyǵa ortaq deklaratsııa jónindegi qarar qabyldady», - dedi Nazarbaev.