Elbasy Jambyl oblysynyń halqyna rızashylyǵyn bildirdi

TARAZ. QazAqparat - Memleket basshysy Nursultan Nazarbaev Jambyl oblysynyń ákimi Asqar Myrzahmetov pen óńir turǵyndaryna alǵys hat joldady, dep habarlaıdy QazAqparat tilshisi. 

Hatta Elbasy aımaq basshysy men halqyn Astananyń 20 jyldyq mereıtoıymen quttyqtap, jyly lebizin bildirgen.

«Qurmetti Asqar Isabekuly! Sizdi jáne búkil Jambyl oblysynyń jurtshylyǵyn Astananyń 20 jyldyǵymen shyn júrekten quttyqtaımyn! Táýelsiz Qazaqstannyń sımvoly sanalatyn bas qalamyzdyń aıtýly mereıtoıy - barsha qazaqstandyqtarǵa ortaq qýanysh. Saryarqa tósine qazyǵyn qaqqan eńseli elordamyzdy turǵyzýǵa búkil halqymyz jumyla atsalysty. "Óńirlerdiń Astanaǵa tartýy" jobasy aıasynda Jambyl oblysy da elordaǵa erekshe syı jasady. Uzaq qashyqtyqty qamtıtyn jáne tolyq jabdyqtalǵan velosıped jolaǵy adamdarǵa arnalǵan qaladaǵy zamanaýı ortanyń mańyzdy quramdas bóligi sanalady. Bul velosıped jolaǵy salamatty ómir saltyn nasıhattap, elordada jappaı sportpen shuǵyldaný úrdisin  damytýǵa septigin tıgizetin bolady» delingen alǵys hatta.

Nursultan Ábishuly sózin qorytyndylaı kele Astanany kórkeıtýge qosqan úlesi úshin Jambyl oblysynyń ákimi men óńir halqyna shynaıy rızashylyǵyn bildirgen.

«Sizge jáne óńir turǵyndaryna shynaıy rızashylyǵymdy bildiremin. Sizderge zor densaýlyq, baq-bereke tileımin!» dep aıaqtalady mátin.

Eske sala keteıik, Jambyl oblysy elordanyń 20 jyldyǵyna oraı basqa óńirlermen birigip, uzyndyǵy 56 shaqyrymǵa jetetin velojoldy syıǵa tartqan bolatyn.