Elbasy usynǵan jobalardyń iske asýyn baqylaıtyn naqty mehanızmder kerek - sarapshy

ASTANA. QazAqparat - Elbasy Nursultan Nazarbaevtyń «Uly dalanyń jeti qyry» baǵdarlamalyq maqalasy aıasynda jańa kórkem jáne derekti fılmder túsirý, ǵylymı-tanymdyq ádebıetterdi basyp shyǵarý - sózsiz qazaqstandyqtardyń otandyq tarıhqa degen qyzyǵýshylyǵyn arttyrady. QR Tuńǵysh Prezıdenti janyndaǵy Álemdik ekonomıka jáne saıasat ınstıtýtynyń sarapshysy Radık Temirǵalıev tyń jobalarǵa qatysty osyndaı pikir bildirdi, dep habarlaıdy QazAqparat tilshisi.

«Memleket basshysy atap otyrǵan jańa jobalar sózsiz tarıh ǵylymynyń damýyna muryndyq bolyp, qazaqstandyqtardyń arasynda tarıh ilimine degen qyzyǵýshylyqty arttyrady. Qytaı, Iran, Túrkııa, Reseı men taǵy basqa elderde zertteýshiler men tarıhshylardyń qoly tımegen tarıhı maǵlumattar áli de saqtaýly. Olardyń bárin de ǵylymı aınalymǵa engizý otandyq tarıhty tereń túsinýge sep bolary haq», - deıdi sarapshy.

Radık Temirǵalıevtyń aıtýyna qaraǵanda, Qazaqstanǵa mundaı tarıhı ári qundy qujattardy ákep qana qoımaı, qaı zertteýshi qandaı eńbek jasaǵanyn pash etý úshin qujattardyń elektrondy kóshirmelerin ashyq kúıde jarııalaý kerek.

«Ashyqtyq burynǵy baǵdarlamalar men jobalarda kezdesken qatelikterden boı alystatýǵa kómektesedi. Jańa kórkem jáne derekti fılmder túsirý, ǵylymı-tanymdyq ádebıetterdi basyp shyǵarý, sózsiz qazaqstandyqtardyń otandyq tarıhqa degen qyzyǵýshylyǵyn arttyrady. Bul jobalardy júzege asyrýda sapany baqylaıtyn mehanızmderdi qarastyrý kerek. Bul sharalar Memleket basshysynyń jańa maqalasyndaǵy ıdeıalarynyń bedelin túsirýge jol bermesi anyq», - deıdi sarapshy.

Eske sala ketsek, 21 qarasha kúni Elbasy Nursultan Nazarbaevtyń «Uly dalanyń jeti qyry» atty maqalasy jarııalanǵan bolatyn.