Elbasy ÚEU-larǵa berýge bolatyn memqyzmetterdi atady
«ÚEU-lardyń daýysy estilýi úshin azamattyq baqylaýdyń tıimdi tetigin ázirleý mańyzdy. Olardan basty ala qashpaı, tyńdaı bilý qajet. Atalǵan daýys shoǵyrlandyrylýy kerek. Bul jerde negizgi rólge Qazaqstannyń azamattyq alıansy ıe bolýy tıis», - dedi Memleket basshysy.
Qazaqstan Prezıdenti memlekettik qyzmetterdi úkimettik emes sektorǵa berý jumystaryn jalǵastyrý qajettigine de basa nazar aýdartty.
«Bir qaraǵanda tosyn dúnıedeı kórinedi. Memlekettik qyzmetterdi úkimettik emes sektorǵa berý qalaı bolmaq? Memleket óz isi úshin halyq aldynda esep beredi, al ÚEU-lar kimniń aldynda jaýap beredi? Degenmen, bul baǵytta máselen, ekologııa, áleýmettik jumystar, balalardyń quqyqtaryn qorǵaý jáne basqa da salalardaǵy jobalardy júzege asyrýǵa bolar edi», - dedi Nursultan Nazarbaev.
Osy oraıda Memleket basshysy taıaýdaǵy a Joldaýynda azyq-túlik pen dári-dármek sapasyn tekseretin arnaıy komıtet qurýǵa tapsyrma bergenin eske saldy. Elimizde bul máselelermen aınalysatyn Tutynýshylardyń quqyǵyn qorǵaý komıteti jumys isteıtindigin, degenmen, bul salany resmılendirý qajettigin atap ótti.
«Forým qatysýshylary yntymaqtastyqtyń mundaı formatyna daıyn ekendikterin jetkizdi. Úkimetke, sáıkesinshe mınıstrlikterge bul jaıynda oılanýdy usynamyn. Úılestirýshi Qoǵamdyq damý mınıstrligi bolady. Bul máselege qatysty osy jerde aıtylǵan barlyq usynystardy tyńǵylyqty zerdelep, is júzinde júzege asyrýǵa kirisý qajet», - dedi QR Prezıdenti.