Elbasy Túrki keńesin «Qazirgi zamanǵy Jibek joly» atty birlesken týrıstik ónimdi qoldaýǵa shaqyrdy

ASTANA. QazAqparat - Túrki memleketteri arasynda kólik ınfraqurylymyn jetildirý týrızmdi damytýǵa da jol ashady. Búgin Aqordada ótip jatqan Túrki memleketteri yntymaqtastyǵynyń besinshi sammıtiniń otyrysynda QR Prezıdenti Nursultan Nazarbaev osylaı málim etti.

«Men byltyr Shanhaıda Azııadaǵy ózara is-qımyl jáne senim sharalary jónindegi keńeste Azııadaǵy qaýipsizdik jáne damý uıymyn qurýdy usynǵan bolatynmyn. Jalpy, aınaladaǵy geosaıası úderister bizder úshin jańa múmkindikter týdyryp otyr. Eýrazııalyq ekonomıkalyq odaq pen Jibek joly ekonomıkalyq beldeýi jobasynyń túıisýi Eýrazııa qurlyǵynda ekonomıkalyq turaqtylyq pen ózara tıimdi yntymaqtastyqty qamtamasyz etedi. Bul rette bizdiń elderimiz Qytaı, Reseı, Taıaý Shyǵys, Kavkaz, Ortalyq Azııa óńirleriniń ekonomıkalyq kommýnıkatsııa, jol taraptaryn biriktiretin qurlyqaralyq tranzıttik kópirine aınalmaq. Sondyqtan da, bizge Kaspıı teńiziniń tranzıttik áleýeti men ótkizý qabiletin arttyrý qajet»,- dedi N. Nazarbaev.

Sonymen qatar, Elbasy joǵary jyldamdyqqa ıe mýltımodeldi eýrazııalyq ıntegratsııalyq kólik dálizin qurýdyń ózekti ekenin de atap ótti. Prezıdent bul rette «Batys Eýropa-Batys Qytaı» kóliktik dáliziniń osy keńistiktegi basty tranzıttik arnaǵa aınalatynyna senim mol ekenin jetkizdi.

«Bul Qazaqstandaǵy «Nurly jol» baǵdarlamasynyń basym baǵyttarynyń biri. Kólik ınfraqurylymyn jetildirý bárimizge ortaq ıgilikti sala. Bul týrızmdi damytýǵa da kóp múmkindikter beredi. Osyǵan oraı, Túrki keńesin «Qazirgi zamanǵy Jibek joly» atty birlesken týrıstik ónimdi qoldaýǵa shaqyramyn. Ony uıymǵa múshe memlketter týrızm strategııalaryna engizgen jón», - dedi N. Nazarbaev.