Elbasy: Túrki halyqtary 21 ǵasyrda yntymaq jarastyrýy qajet

ASTANA. QazAqparat - Túrki halyqtary saıasatta, ekonomıkada, ǵylym men tehnologııada ózara yqpaldastyq pen baılanystardy kúsheıte berýi tıis. Bul týraly búgin Astanadaǵy Táýelsizdik saraıynda Qazaq handyǵynyń 550 jyldyǵyna arnalǵan saltanatty jıynda Elbasy Nursultan Nazarbaev málim etti.

«Búginde táýelsiz túrki memleketteri Túrkııa, Qazaqstan, Ózbekstan, Ázerbaıjan, Túrkimenstan, Qyrǵyzstan jáne dúnıeniń ár túpkirine tarydaı shashylǵan jalpy sany 200 mıllıonnan asatyn 30-dan astam túrki tildes ulttar men ulystardyń uly babasy - Er Túrik atalarymyz bolǵan», - dep atap ótti Prezıdent.

Osy oraıda Elbasy túrki halyqtary jaratylysynda árdaıym birge, bereke-birlikte bolýy úshin jaratylǵanyn qadap aıtty.

«Babalarymyz da osyny bizge mıras etken. Birlik - bizdiń barlyq jeńisterimizdiń altyn qaınary, el qorǵaǵanda kúsh-qýat berer asqaq aıbary. Osyny árdaıym jadymyzda ustaýymyz kerek. Jahandaný zamanynda taǵdyr-talaıymen bólinip ketken tili, dili, dini men tegi bir túrki halyqtary 21 ǵasyrda yntymaq jarastyrýy qajet. Sóıtip,saıasatta, ekonomıkada, ǵylym men tehnologııada ózara yqpaldastyq pen baılanystardy kúsheıte berýimiz kerek. Ata tarıhy bizdi osyǵan shaqyrady», - dedi N. Nazarbaev.