Elbasy túrik kompanııalaryn Qazaqstanda bıznesterin damytýǵa shaqyrdy
«Investıtsııalyq ahýaldy jaqsartý boıynsha keshendi jumys júrgizip kelemiz. Kásipkerlikti damytý úshin zańnamaǵa tıisti ózgerister de engizilýde. Dúnıejúzilik banktiń «Doing business» reıtınginde Qazaqstan 190 eldiń ishinde 36-orynǵa ıe boldy. Qazaqstan Ekonomıkalyq yntymaqtastyq jáne damý uıymy Investıtsııa komıtetiniń múshesi, Halyqaralyq ınvestıtsııalar týraly dekalaratsııaǵa qosyldy», - dep atap ótti Elbasy.
Sondaı-aq Nursultan Nazarbaev Qazaqstan Prezıdenti janyndaǵy Sheteldik ınvestorlar keńesi 20 jyldan beri tıimdi jumys istep kele jatqanyna toqtaldy. Atalǵan keńeske dúnıeniń eń úlken kompanııalarynyń basshylary kiredi.
«Menimen tikeleı kezdesýde biz barlyq máselelerdi sheship otyramyz. «Anadolu group» jáne «Sembol Constraction» kompanııalarynyń basshylary osy keńestiń músheleri bolyp tabylady. Investorlarmen jáne bıznespen tıimdi ózara árekettesý maqsatynda ISPAT túrik agenttigine uqsas «Qazaq ınvest» ulttyq kompanııasy quryldy. Mańyzdy salalarda metallýrgııa, munaı óńdeý, mashına jasaý, hımııa, azyq-túlik óndirisi, ınvestıtsııalyq jobalardy júzege asyrý kezinde korporatıvtik jer jáne múlik salyqtarynan bosatý qarastyrylǵan. Mundaı jobalar úshin sheteldik jumys kúshin tartý kvotasyz jáne arnaıy ruqsatsyz júzege asyrylady. Jer qoınaýyna lıtsenzııalardy alý sharttaryn jasasý tártibi jeńildetildi»,- dedi Qazaqstan Prezıdenti.
Munan bólek, Memleket basshysy jańartylǵan energııa kózderin damytý maqsatynda aýktsıon arqyly ınvestorlarǵa kepildendirilgen off-take kelisimshartqa ınvestıtsııalyq jeńildikter qarastyrylǵanyn aıtty.
«Qazaqstanda 11 arnaıy ekonomıkalyq 24 ındýstrııalyq aımaq jumys isteıdi. Olardyń qatysýshylaryna salyq jáne basqa da jeńildikterdiń barlyǵy berilgen. Túrik kompanııalaryn Qazaqstanda bıznesterin damytýǵa taǵy da shaqyramyz», - dedi Nursultan Nazarbaev.
Aıta keteıik, Qazaqstan Prezıdentimen kezdesýge Túrkııa ekonomıkasynyń 15 paıyzyn quraıtyn 25 kompanııanyń basshylary qatysty. Atalǵan kompanııalar aýyl sharýashylyǵy, tamaq ónerkásibi, geologııa jáne taý-ken óndirý ónerkásibi, hımııa ónerkásibi, mashına jasaý, jeńil ónerkásip, densaýlyq saqtaý jáne farmatsevtıka salalarynda jumys isteıdi.