Elbasy týraly zań: Senat birlesken komıssııa músheleri men baıandamashyny saılaıdy
Senatorlar aldaǵy otyrysta Memleket basshysy usynǵan kandıdattardy Joǵarǵy sot sýdıalary qyzmetinen bosatý máselesin qaraıdy. Sondaı-aq «Qazaqstan Respýblıkasynyń Tuńǵysh Prezıdenti – Elbasy týraly» Qazaqstan Respýblıkasy Konstıtýtsııalyq zańynyń kúshi joıyldy dep taný týraly» Konstıtýtsııalyq zańnyń jobasy boıynsha Parlament palatalarynyń birlesken komıssııasynyń múshelerin jáne Senattan qosymsha baıandamashy saılaýdy josparlap otyr.
Sonymen qatar depýtattar «Qazaqstan Respýblıkasynyń Úkimeti men Shveıtsarııa Konfederatsııasynyń Federaldyq Keńesi arasyndaǵy baǵaly metaldardan jasalǵan buıymdardaǵy synamalyq tańbany ózara taný jónindegi kelisimdi ratıfıkatsııalaý týraly» zańdy qaraıdy. Onyń erejeleri elder arasyndaǵy yntymaqtastyqty ońaılatý úshin baǵaly metaldardan jasalǵan buıymdardaǵy synamalyq tańbany ózara tanýdy kózdeıdi. Bul rette buıymdar osy kelisimniń talaptary men ımporttaýshy taraptaǵy memlekettiń ulttyq zańnamasyna sáıkes kelýge tıis.
Palatanyń aldaǵy otyrysynyń kún tártibindegi taǵy bir másele «Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy azamattyq áýe kemelerin avıatsııalyq izdestirý jáne qutqarý salasyndaǵy yntymaqtastyq týraly kelisimdi ratıfıkatsııalaý týraly»zań bolyp otyr. Qujat apatqa ushyraǵan ushaqtardyń jolaýshylary men ekıpajdaryn izdeý men qutqarýda memleketter arasyndaǵy yntymaqtastyqty odan ári kúsheıtýge baǵyttalǵan.
Sondaı-aq Bıýro músheleri Májilisten kelip túsken zańdardy Senattyń turaqty komıtetterine bólip berdi.
Foto: senate.parlam.kz