Elbasy týraly zamandasynyń pikiri: Lıderlik qabilettiń bárin boıyna jınaǵan

ALMATY. QazAqparat - QR Tuńǵysh Prezıdenti batyl, kóregen, aqyldy azamat. Ol naǵyz kóshbasshylyq qabiletti boıyna jınaǵan tulǵa. Nursultan Ábishuly Nazarbaevty óziniń zamandasy, bir kezdegi Qazaq SSR-iniń komsomol, partııa jáne memleket qaıratkeri, Almaty qalalyq ardagerler keńesiniń belsendisi Vera Sıdorova osylaı sıpattap berdi, dep habarlaıdy QazAqparat tilshisi.

«Men Memleket basshysymen 1962 jyldan beri tanyspyn. Prezıdentimiz ol kezde Qaraǵandy metallýrgııalyq kombınatynyń jumyskeri bolatyn. Sol jyly óndiris jumysshylarynyń jıyny boldy. Men komsomoldyq jumysta edim, men de qatystym. Men sol sátte Elbasyny baıqadym. Eldiń bári sol kisimen sýretke túsip, qol alysyp amandasyp jatty. Onyń jymıysy, adamdarmen jyly qatynasy janymdy jadyratty. Meniń baıqaýymsha, Nursultan Ábishuly sol keıpinen áli kúnge de tanǵan joq», - dedi Vera Vasıleva.

Jas maman Nursultan Nazarbaevpen Mınıstrler kabınetiniń tóraǵasy bolǵan kezde jaqynyraq tanysa bastaǵan.

«Ol kisi Dinmuhammed Ahmetulymen bizdiń ólkege saparlap keldi. Men ol kezde Qostanaı aýdandyq partııa komıtetiniń birinshi hatshysy bolatynmyn. Sodan bastap mańyzdy máselege qatysty jıyndarda jıi kezdese bastadyq. Ol óte aqyldy, bilimdi, kóregen azamat. Barlyq jetistikke tek qana óz eńbeginiń arqasynda jetti. Aınalasynda bilikti mamandardy biriktire bildi. Onyń tula boıynda lıderge tán qabilettiń bári boldy», - dedi Vera Sıdorova.