Elbasy: Týǵan jerge degen súıispenshilik taqyrybyn jandandyrý qajet
22:15, 20 Sáýir 2017
ASTANA. QazAqparat - Búgin elimizdiń zııaly qaýym ókilderimen kezdesken Elbasy Nursultan Nazarbaev týǵan jerge degen súıispenshilikten bastaý alatyn patrıotızm taqyrybyn jandandyrý qajettigine nazar aýdardy, dep habarlaıdy QazAqparat Aqordanyń baspasóz qyzmetine silteme jasap.
Kezdesý barysynda Qazaqstan Prezıdenti óziniń taıaýda jaryq kórgen «Bolashaqqa baǵdar: rýhanı jańǵyrý» atty maqalasynyń keıbir baǵyty men basymdyqtaryna toqtaldy.
Sondaı-aq kezdesýde táýelsizdik jyldarynda iske asyrylǵan iri shyǵarmashylyq jobalardyń mańyzdy máseleleri talqylandy.
Máselen, Qazaqstan aýmaǵyndaǵy tarıhı-mádenı eskertkishter men nysandardy qalpyna keltirýge septigin tıgizgen «Mádenı mura» baǵdarlamasy, sondaı-aq álemniń jetekshi arhıvterinen elimizdiń tarıhyna qatysty qujattardy júıeli túrde jınaqtap, taldaý júrgizýge múmkindik bergen «Halyq tarıh tolqynynda» baǵdarlamasy áńgimege arqaý boldy.