Elbasy tórtinshi zaýyttyń ornyna Shymkent Munaı óńdeý zaýytyn keńeıtý týraly Úkimet usynysyn qoldady
Bul týraly búgin Parlament Májilisiniń Ekologııa jáne tabıǵatty paıdalaný komıtetiniń keńeıtilgen otyrysynda Energetıka vıtse-mınıstri Uzaqbaı Qarabalın málim etti.
Vıtse-mınıstrdiń aıtýynsha, búgingi kúni Qazaqstandaǵy úsh munaı óńdeý zaýytynyń shyǵaryp otyrǵan ónim kólemi ishki suranystyń tek 70 paıyzyn ǵana qamtı alady. Osyǵan baılanysty Elbasy bolashaqta tórtinshi zaýyt salý máselesin qarastyrýdy usynǵan bolatyn. «Qazirgi tańda úsh zaýytta qaıta jańǵyrtý jumystary ótýde. Qaıta jańǵyrtýdaǵy eń birinshi maqsaty - ár zaýyttyń óndirý qýatyn arttyrý. Qazirgi jaǵdaıda bizdiń zaýyttyń árqaısysy 14 mln. tonna tóńireginde munaı óńdeıtin bolsa, jańǵyrtý jumysynan soń 18,5 mln. tonnalyq kórsetkishke qol jetetin bolady. Bul tek 2016 jyldan keıin oryn alady», - dedi Uzaqbaı Qarabalın.
Onyń sózine qaraǵanda, dúnıejúzindegi tájirıbe boıynsha jańa zaýyt salý barysynda onyń tıimdiligi negizinen 10 mln. tonna ónimdi óndire alatyndaı aýmaqta qarastyrylady. ıAǵnı, dál osyndaı kórsetkish bolǵanda ǵana jańa zaýyt salý ózin-ózi aqtaı alady.
«Jańa zaýyttyń osyndaı qýatyn salý úshin bizge 6-8 mlrd dollarǵa deıin qarajat ketedi. Ekinshiden, bolashaqta qajetti janar-jaǵarmaıdyń kólemin eskere otyryp, biz Elbasyna Úkimettiń atynan usynys engizdik. Onda jańa zaýyttyń ornyna Shymkenttegi munaı óńdeý zaýytyn keńeıtýdi usyndyq. Bul usynysty Elbasy qoldady», - dedi U. Qarabalın.
Onyń sózine qaraǵanda, Shymkenttegi zaýyttyń Keńes Odaǵy tusynda jasalǵan ınfraqurylymdyq jobasy 12 mln. tonnaǵa negizdelgen. Sondyqtan da, qazirgi tańda jańa zaýyt qurylysynan góri Shymkent MÓZ keńeıtý tıimdi bolmaq. «Birinshiden, buǵan ketetin shyǵyn da azaıady, tıimdiligi de artady. Máselen, sol óńirde halyqtyń shoǵyrlanýy jaqsy, ıaǵnı suranys ta artady. Suranystan artylǵan ónimde ońtústiktegi kórshilerge qaraı bolýy yqtımal. Óıtkeni, soltústiktegi Reseıge eksporttaý múmkin emes, Qytaı da óziniń munaı óńdeý zaýytyn salyp aldy, batysta Ázerbaıjannyń munaıy bar. Al Shymkenttegi munaıdyń artylǵanyn Ózbekstan, Qyrǵyzstan, Aýǵanstan men Tájikstanǵa jóneltýge múmkindik bar. Sondyqtan da, eń tıimdi nusqasy - tórtinshi zaýyttyń ornyna Shymkenttegi Munaı óńdeý zaýytyn keńeıtý bolyp otyr», - deıdi U. Qarabalın.