Elbasy TMYK beıresmı sammıtine qatysty
Nursultan Nazarbaev sammıtti barsha túrki halyqtarynyń kıeli mekeni – Túrkistan qalasynda ótkizý josparlanǵanyn, alaıda sońǵy ýaqytta kóptegen halyqaralyq is-sharalar epıdemıologııalyq ahýalǵa baılanysty onlaın rejımde ótip jatqanyn aıtty. Soǵan baılanysty osy basqosýdy da beınekonferentsııa formatynda ótkizý týraly sheshim qabyldanǵanyn jetkizdi.
– Búgingi basqosýymyz «Túrkistan – Túrki áleminiń rýhanı astanasy» taqyrybymen ótedi, – dedi Túrkitildes memleketterdiń yntymaqtastyq keńesiniń Qurmetti tóraǵasy.
Qazaqstannyń Tuńǵysh Prezıdenti oblys ortalyǵy 2018 jyly Shymkent qalasynan Túrkistanǵa kóshirilip, sol ýaqyttan tutas ólkeniń jańa tarıhy bastalǵanyna toqtaldy.
– Eki jyl ishinde qala túbegeıli ózgerdi, bul jumys áli de jalǵasa beredi. Qalanyń keleshek arhıtektýralyq kelbetin qalyptastyrǵanda, álbette, tarıhı sabaqtastyq saqtalady, – dedi Nursultan Nazarbaev.
Elbasy is-sharaǵa qatysýshylardy koronavırýs pandemııasyna baılanysty ahýal túzelgennen keıin Túrkistanǵa kelýge shaqyrdy.
Qazaqstannyń Tuńǵysh Prezıdenti beıresmı sammıt Túrki keńesine múshe baýyrlas elder arasyndaǵy dostyq pen yntymaqtastyqty odan ári nyǵaıtýǵa tyń serpin beretinine senim bildirdi. Sondaı-aq Nursultan Nazarbaev COVID-19 pandemııasyna baılanysty halyqaralyq qoǵamdastyq úshin qıyn-qystaý kezeńde de túrki elderi birligin saqtap qalǵanyn atap ótti.
– Meniń usynysym boıynsha «Túrki áleminiń keleshegi – 2040» qujaty der kezinde ázirlendi dep esepteımin. Bul qujatty bıyl kúzde Túrkııada ótetin kezekti sammıtte qabyldaımyz. Bakýdegi sammıtte Keńesti Uıym deńgeıine kóterýdi usynǵan bolatynmyn. Sol mańyzdy usynysty qoldaǵandaryńyz úshin barshańyzǵa alǵysymdy bildiremin, – dedi Elbasy.
Túrkitildes memleketterdiń yntymaqtastyq keńesiniń Qurmetti tóraǵasy ekonomıka salasynda ózara saýda men ınvestıtsııa kólemin ulǵaıtýdyń áleýeti zor ekenine toqtaldy.
– Baký men Erevan arasyndaǵy beıbit kelisimder Uly Jibek jolyn qaıta túletip, Kaspıı teńiziniń rólin arttyrady. Bul Qytaıdyń «Bir beldeý, bir jol» bastamasynyń artyqshylyqtaryn elderimizdiń tıimdi paıdalanýy úshin jańa múmkindikterge jol ashady. Transkaspıı halyqaralyq kólik dálizi («Turan» dálizi) Eýropa men Azııany jalǵaıtyn eń qaýipsiz ári qysqa saýda jolyna aınalyp keledi, – dedi Nursultan Nazarbaev.
Sammıt aıasynda túrkitildes memleketter arasyndaǵy ekonomıka, kólik, kommýnıkatsııa jáne mádenı-gýmanıtarlyq salalardaǵy yntymaqtastyq aıasyn keńeıtip, nyǵaıtý jaıy talqylandy.
Sondaı-aq Elbasy kúlli adamzat aldynda turǵan jańa syn-qaterlerge nazar aýdardy. Nursultan Nazarbaev túrki memleketteriniń kóshbasshylaryn qazirgi kúrdeli halyqaralyq ahýalǵa oraı Vashıngton, Máskeý, Beıjiń jáne Brıýssel arasynda aýqymdy kelissózder protsesin bastaý jónindegi óziniń usynysyn qoldaýǵa shaqyrdy.
– Atalǵan tórt tarap adamzattyń bolashaǵy, halyqaralyq qaýipsizdik pen turaqtylyq úshin ózderine júktelgen erekshe jaýapkershiliktiń salmaqty ekenin tolyq sezinedi dep senemin. Túrkitildes memleketterdiń basshylary meni qoldaıtynyna jáne bul másele boıynsha baıypty pikir bildiretinine senimdimin. Bizdiń ortaq kózqaras-pikirimiz alpaýyt memleketterdiń astanalaryna jetedi dep úmittenemin, – dedi Qazaqstannyń Tuńǵysh Prezıdenti.
Sońynda Elbasy túrki elderiniń kóshbasshylaryn ortaq meıram Naýryzben quttyqtap, baýyrlas halyqtarǵa tynyshtyq pen ıgilik tiledi.
Sammıtke sondaı-aq Qazaqstan Prezıdenti Qasym-Jomart Toqaev, Túrkııa Prezıdenti Rejep Taıyp Erdoǵan, Ázerbaıjan Prezıdenti Ilham Álıev, Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov, Túrikmenstan Prezıdenti Gýrbangýly Berdimuhamedov, Majarstan Premer-mınıstri Vıktor Orban, Túrkitildes memleketter yntymaqtastyq keńesiniń Bas hatshysy Baǵdat Ámireev qatysty.