Elbasy TMD-nyń birqatar elderi dinbasylarymen – ıslam din ókilderimen kezdesti
Ózbekstan musylmandary dinı basqarmasynyń tóraǵasy Nurıddın Halıknazarovpen, Qyrǵyzstan musylmandary dinı basqarmasynyń tóraǵasy Zamır Rakıevpen, Reseı Federatsııasy musylmandary dinı basqarmasy tóraǵasynyń birinshi orynbasary Damır Mýhetdınovpen ótken kezdesý barysynda Qazaqstannyń Tuńǵysh Prezıdenti olarǵa astanadaǵy jańa meshittiń ashylýy rásimine qatysýǵa ýaqyt bólip, arnaıy kelgenderi úshin rızashylyq bildirip, alǵysyn aıtty.
Nursultan Nazarbaev dinniń Qazaqstan halqy ómirinde aıryqsha oryn alatynyn atap ótip, elimizde konfessııalar arasyndaǵy dıalog máselesine udaıy basa kóńil aýdarylyp kele jatqanyn jetkizdi. Qazaqstannyń Tuńǵysh Prezıdenti jańa meshittiń ıslamdaǵy tatýlyq pen toleranttylyq ıdeıasynyń myzǵymas mánin aıshyqtap turǵanyn, onyń esigi barlyq din men ulttyń ókilderi úshin árdaıym ashyq bolatynyna toqtalyp ótti.
Óz kezeginde qonaqtar da Qazaqstannyń astanasyna degen súısinisterin jasyrmaı, jańa meshit rýhanı ortalyq qana emes, qalanyń asa kórnekti ornynyń taǵy birine aınalatyny jóninde pikir bildirdi.
Foto: elbasy.kz