Elbasy tapsyrmasyn oryndamaǵan ulttyq kompanııalarǵa Úkimet qatań shara qabyldaýy kerek - V. Bobrov

ASTANA. 7 qarasha. QazAqparat - Prezıdenttiń vedomstvo qurylymdaryna qarasty kásiporyndardy qaıta jekeshelendirý jónindegi tapsyrmasyn oryndamaǵan ulttyq kompanııalarǵa qatysty Úkimet qatań sharalar qabyldaýy kerek. Bundaı pikirdi búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Parlament Senatynyń depýtaty Vladımır Bobrov aıtty.

Eske sala keteıik, brıfıng negizinen 11 qazanda ótken Úkimettiń keńeıtilgen otyrysyndaǵy Elbasy júktegen tapsyrmalardy júzege asyrý máselelerine arnalǵan bolatyn. Depýtattyń aıtýynsha, elimizde qazirgi tańda 6 myńnan astam memlekettik kásiporyndar bar. Al solardyń tek 4 paıyzy ǵana qaıta jekeshelendirýge berilgen. Bul rette senator mundaı kásiporyndar qurýdyń keıbireýlerge paıdaly tustary týraly kúmánin alǵa tartady. Onyń aıtýynsha, osyndaı árbir kásiporynnyń artynda naqty adamdar, memlekettik nemese ulttyq kompanııa qyzmetkeri tur. «Mundaı sektorlarda jumys isteıtin barlyq kásiporyndardyń memleket úshin tıimdiligi shamaly. Solaı bola tura osy kásiporyndardyń menedjerleri keremet aılyq alyp otyr. Mundaı kompanııalarǵa jumysqa turý árbir qazaqstandyqtyń armanyna aınaldy. Sol úshin biz búgin osylarmen kúresip jatyrmyz. Degenmen, bizdiń qolymyzdan kóp nárse kelip jatqan joq», - dedi V. Bobrov. Sonymen qatar, senator Elbasy tapsyrmasynyń oryndalmaı otyrǵanyna qatysty birqatar mysaldardy da alǵa tartty.