Elbasy tapsyrmasy: Shymkenttegi birneshe basqarmada keshki segizde jınalys ótkizilgen
Atalǵan departamenttiń málimetinshe, ár memlekettik organnyń ádep jónindegi ýákilderiniń qatysýymen reıdtik is-sharalar uıymdastyrylǵan. Memlekettik qyzmetshiler arasynda saýalnama júrgizilgen. 5 qarasha kúni júrgizilgen reıd kezinde Shymkent qalasynyń Jumyspen qamtý jáne áleýmettik qorǵaý basqarmasynda keshki saǵat 20:15-te basqarma basshysynyń qatysýymen jınalys ótkizilgeni anyqtaldy. Basshynyń jumys bólmesinde ótken jınalysqa basqarmanyń birqatar qyzmetshileri qatysqan. Dál osyndaı jaǵdaı qalalyq Aqparattandyrý, memlekettik kórsetiletin qyzmetter jáne arhıvter basqarmasynda jáne Eńbek ıspektsııasy basqarmasynda, sonymen birge, Ekonomıka jáne bıýdjettik josparlaý basqarmasynda da oryn alǵan. Tekserý barysynda atalǵan basqarmalardyń qyzmetkerleri keshki saǵat 20:00-de tolyqtaı jumys ornynda bolý faktisi oryn alǵan.
Al, 2018 jylǵy 6 qarashada keshki saǵat saǵat 19:44-te qalalyq Memlekettik kirister departamentiniń Abaı aýdany boıynsha basqarmasynda bas mamannyń jumys istegeni anyqtaldy. Ol óziniń bir saǵattan astam júkteme jumys jasaýynyń sebebin tapsyrma aýqymdylyǵynyń kóptiginen dep túsindirgen.
Osylaısha, Elbasynyń memlekettik qyzmetshiler belgilengen merzimnen tys ýaqytta jumys jasamaýǵa tıis degen tapsyrmasy joǵaryda kórsetilgen memlekettik organdarda tıisinshe oryndalmaýda.
«Ádep jónindegi keńes múshelerimen jáne ýákildermen birigip júrgizilgen reıdtik is-sharalarda anyqtalǵan jaıttar boıynsha naqty sharalar qabyldanady. Ol úshin memlekettik organ basshylarymen joǵarǵy turǵan organ basshylaryna usynystar engiziledi. Sondaı-aq, departament osy turǵydaǵy jumystardy turaqty túrde júrgizetin bolady» delingen habarlamada.