Elbasy tapsyrmasy: ShQO turǵyndarynyń jalaqysy óse bastady

ÓSKEMEN. QazAqparat - Shyǵys Qazaqstan oblysyndaǵy iri kásiporyndar eń tómengi jalaqy mólsherin 2019 jylǵy 1 qańtardan bastap arttyrmaq, dep habarlaıdy QazAqparat tilshisi óńirdiń aqparattyq ortalyǵyna silteme jasap.

Shyǵys Qazaqstanda 57 iri kásiporyn bar. Birneshe kompanııa Elbasy Joldaýy jarııalanǵannan keıin-aq óz qyzmetkerleriniń eń tómengi jalaqysyn kótergen.

Atap aıtqanda, «Azııa Avto» AQ jumysshylarynyń tabysy orta eseppen 20% ósti. Óskemen armatýra zaýytynda, «SemAz» kompanııasynda, «Semeı ınjınırıng» jáne Óskemen maı zaýytynda da eń tómengi jalaqy mólsheri artty.

2019 jyly 24 kásiporyn eńbekaqyny kótermek. «Qazmyrysh» jaýapkershiligi shekteýli seriktestiginde esep-qısaptar júrip jatyr. Jospar boıynsha, ártúrli mamandyqtaǵy qyzmetkerlerdiń jalaqysy orta eseppen 3-20% aralyǵynda, jalpy, kompanııadaǵy jalaqynyń ortasha máni 10% ósedi.

Sátbaev taý-ken baıytý kásipornynda jalaqy 5 paıyzdan 12 paıyzǵa deıin ósedi. «FIK «ALEL» aktsıonerlik qoǵamy qyzmetkerleriniń tabysy bıyldyń ózinde 15,6% ósti. Al 2019 jyly kásiporynnyń myńdaǵan jumysshysynyń jalaqysy kem degende 5% ósedi.

Budan bólek, Óskemen kondensator zaýyty, oblystyq Un-qurama jem kombınaty, Buqtyrma tsement kompanııasy, Rıdder JEO, Semeı «Sý arnasy», «Sılýmın-Vostok» JShS, «DAEWOO Bus Kazakhstan» JShS, Kıiz bastyrý kombınaty, «Tehnologııa komforta» JShS, «Sılıkat» JShS, «KONDIZ» JShS kásiporyndary da jalaqyny kóteredi.