Elbasy tapsyrmasy: Pavlodarda shashtaraz ben satýshynyń da jalaqysy óspek
Oblys ákimdiginde ótken keńeste Prezıdent Nursultan Nazarbaevtyń jalaqyny ósirý týraly tapsyrmasy boıynsha júrgizilip otyrǵan jumysty talqylady. Óńirdiń barlyq iri kásiporyndary Prezıdenttiń bastamasyn qoldap, óz qyzmetkerleriniń jalaqysyn ósirýge daıyn.
«1 qańtardan bastap densaýlyq saqtaý júıesinde jalaqysy tómen bir jumyskerdiń ortasha aılyq tabysy 58 myńnan 70 myń teńgege deıin ósiriledi. Sondaı-aq, bilim, mádenıet jáne áleýmettik sala qyzmetkerleriniń jalaqysy ósiriledi», - dep habarlady Pavlodar oblysy ákiminiń orynbasary Meıram Begentaev.
Oblys ákimi Bolat Baqaýov jekemenshik sektor qyzmetkerleriniń de tys qalmaýyn talap etti. Onyń aıtýynsha, tipti shaǵyn dúkenderdi de baqylaýǵa alý kerek.
«Bazar, shashtaraz, shaǵyn dúkenderde qansha tehnıkalyq jumysker, sypyrýshy, kúzetshi jumys isteıtinin jáne olardyń jalaqysy qandaı ekenin anyqtap alý kerek. Qazirgi kezde aldymyzda jekemenshik sektordaǵy barlyq kásiporyndar qyzmetkerleriniń jalaqysyn ósirý maqsaty tur. Meniń tapsyrmam boıynsha, árbir orynbasarym, qala men aýdan ákimderi bul máseleni jetekshilik etip otyrǵan barlyq salalar, vedomstvolyq baǵynyshty kásiporyndar, shaǵyn jáne orta bıznes sýbektilerinde qarastyrý kerek», - dep málim etti óńir basshysy.
Budan basqa, oblys ákimi baǵalar jaǵdaıyna nazar aýdartty. Ol jalaqy kóterilgennen keıin azyq-túlik pen basqa taýarlardyń baǵasy qymbattamaýy tıis ekenin atap ótti.
«Oblystyq kásipkerler palatasy qazirden bastap bıznesmender, iri jáne shaǵyn saýda jelileriniń basshylarymen tıisti túsindirý jumystaryn júrgizýi tıis. Óńirde jalaqy ósirilgen soń, baǵa kóterilmeýin qadaǵalaýymyz kerek», - dedi ol.
Bolat Baqaýov qala jáne aýdan ákimderine áleýmettik mańyzy bar taýarlar dyń jáne kómir baǵalaryn muqııat qadaǵalaýdy tapsyrdy. Bul jumysqa «Nur Otan» partııasynyń fılıaldary da qosylyp, baǵalardy retteý boıynsha monıtorıng júrgizý toptaryn qurady.