Elbasy tapsyrmasy: Qostanaıda kommýnaldyq qyzmet quny tómendedi

QOSTANAI. QazAqparat - Qostanaı oblysy ákimdiginde Arhımed Muhambetovtyń basshylyǵymen kommýnaldyq qyzmetter tarıfterin retteý máseleleri boıynsha keńes ótti, dep habarlaıdy QazAqparat.

Qostanaı oblysy turǵyn úı-kommýnaldyq sharýashylyq jáne energetıka basqarmasy basshysynyń mindetin atqarýshy Dáýren Asqarov aıtqandaı, 1 qańtardan bastap oblystyń birneshe qalasy men aýdanynda tarıfter tómendetildi.

«Jylý tarıfi 1,5%-dan 14%-ǵa, aýyz sý 3,6%-dan 10%-ǵa, elektr energııasyn tasymaldaý 1,1%-dan 8%-ǵa , sý men káriz 10%-ǵa deıin arzandady. Jyl sońyna deıin árbir eldimeken kommýnaldyq qyzmetter tarıfin tómendetedi. Bul týraly kelisimshart ázirlenip jatyr», - dedi Dáýren Asqarov.

Oblys boıynsha kóppáterli turǵyn úıdi basqarý kooperatıvteriniń jalpy sany - 228. Olardyń 65-i kommýnaldyq tólem baǵasyn 2018 jyl deńgeıinde saqtaıdy, óıtkeni atalǵan kooperatıvter byltyrdan bastap tómendetilgen tarıfte qyzmet kórsetip keledi.

Eske salsaq, Nursultan Nazarbaev bıylǵy Joldaýda turǵyn úı-kommýnaldyq sharýashylyǵy jáne tabıǵı monopolııa qyzmetteriniń tarıfterin retke keltirý jóninde arnaıy tapsyrma bergen bolatyn.

«Memleket basshysy tarıfterdiń negizsiz kóterilýine jol bermeýdi tapsyrǵan edi. Óıtkeni, bul turǵyndardyń ómir súrý deńgeıine, kásipkerlerge, jalpy baǵalarǵa áser etpeı qoımaıdy. Tarıfti áli de tómendetý jumystaryn jalǵastyrý qajet. Mendegi málimet boıynsha, Lısakov qalasynda bir ǵana kooperatıv tarıfti túsirdi. Bulaı bolmaıdy. Tarıfti arzandatý týraly ótken jyldyń qazan aıynda tapsyrma berdim. Demek, jumys sylbyr júrip jatyr. Birinshi kezekte zeınetkerler men halyqtyń áleýmettik jaǵynan osal toptary úshin tarıf qunyn azaıtýdy qolǵa alyńyzdar», - dedi Arhımed Muhambetov.

Óńir basshysy kommýnaldyq qyzmet pen tabıǵı monopolııalardy retteý salalarynda tarıftiń rettelýin qadaǵalaýdy qala jáne aýdan ákimderine tapsyrdy.