Elbasy tapsyrmasy: Qostanaıda 36 myńǵa jýyq adamnyń jalaqysy ósedi
«5 qazanda Qazaqstan Prezıdenti halyqqa Joldaýyn jarııalaǵan bolatyn. Elbasynyń tikeleı tapsyrmasymen tómen jalaǵa alatyn jumyskerlerdiń aılyǵyn 28 myńnan 42 myń teńgege deıin ósirý júktelgen edi. Ol boıynsha oblysymyzdy josparly jumystar júrgizilip jatyr. Bıýdjettik uıymdarda, atqarýshy bılikte qıyndyq joq. Qarajattyń barlyǵy sheshildi. 1 qańtardan bastap jalaqy kóteriledi», - dedi Qostanaı oblysynyń ákimi Arhımed Muhambetov OKQ-da ótken brıfıngte.
Onyń aıtýynsha, aımaqtaǵy jeke kásiporyndar, iri kompanııalar, orta jáne shaǵyn bıznes ókilderi Elbasynyń Joldaýyn búgingi tańda tolyq qoldap otyr.
«Mysaly, 200-den astam kásiporynda 36 myń jumyskerdiń jalaqylary ósip jatyr. Mysaly, 1 qarashadaǵy kórsetkish boıynsha 180 mekemede 4500 adamnyń jalaqysy kóbeıdi. 1 jeltoqsannan 337 mekemede 7600 adamnyń jalaqylary edáýir ósetin bolady. Qalǵan mekemelerde 1 qańtardan bastap ósedi», - dedi ol.
Arhımed Muhambetovtyń aıtýynsha, «Baıan sulý» kondıterlik fabrıkasynda, «Saryarka avtoprom» AQ-da, «Agromash holdıng», «Mılk» kompanııalarynda tómen jalaqy bolmaǵanymen, ol kompanııalar Elbasynyń bastamasyn qoldap, qyzmetkerleriniń jalaqylaryn 10-20 paıyzǵa kóbeıtýde.
Eske sala ketsek, atalmysh brıfıngte Arhımed Muhambetov Qostanaı oblysynda jyl basynan beri avtokólik qurastyrý 15,7 paıyzǵa artqanyn aıtqan bolatyn. Onyń sózine qulaq assaq, osyndaı ósimmen Qostanaı oblysy 2023 jylǵa qaraı jylyna 60 myń avtokólik shyǵarýdy kózdep otyr.
Sondaı-aq, aımaq basshysy óńirdegi agroónerkásiptik keshen salasyna tsıfrlyq tehnologııalar qalaı engizip jatqanyn aıtyp bergen edi.