Elbasy tapsyrmasy: 144 myń soltústikqazaqstandyqtyń jalaqysy 1,5 ese ósedi

ASTANA. QazAqparat - 144 myń soltústikqazaqstandyqtyń jalaqysy 1,5 ese ósedi. Bul týraly búgin Ortalyq komýnıkatsııalar qyzmetindegi brıfıngte Soltústik Qazaqstan oblysynyń ákimi Qumar Aqsaqalov aıtty, dep habarlaıdy QazAqparat tilshisi.

«Memleket basshysynyń Joldaýyndaǵy  eń tómengi jalaqyny 1,5 ese  kóterý tapsyrmasy oblysymyzdyń 144 myń turǵynyna qatysty. Onyń 43 myńy -  bıýdjettik sala qyzmetkeri bolsa, 101 myńy - ekonomıkanyń shynaıy sektorynda jumys isteıtin qyzmetkerler», - dedi ol.

Q.Aqsaqalov, sonymen qatar, aǵymdaǵy jyly elimizdiń eńbek kúshi kóp óńirlerinen 400 otbasy soltústikke qonys aýdarǵanyn atap ótti.

«Olar úshin biz damý reıtıngi ortasha jáne joǵary 302 aýylda 3 myńnan astam úıdi úsh jyldyń ishinde salýdy josparlap otyrmyz», -dedi óńir basshysy.

Onyń aıtýynsha, atalǵan aýyldardyń joldaryn jaqsartyp, aýyz sýmen qamtamasyz etý, mektepter men balabaqshalardy, mádenıet úılerin jóndeý jáne aýyl sharýashylyǵy taýarlaryn óndirýshilerdi qoldaý úshin qarajat bólinetin bolady.  Bul sharalar óńir tartymdylyǵyn arttyryp, kóshi-qondaǵy teris saldony 2019 jyly 2600, al 2020 jyly 1100 adamǵa deıin tómendetýge múmkindik beredi.