Elbasy sheıh Muhammedten «Ábý Dabı plaza» kesheni qurylysyn tezdetýdi surady

ASTANA. QazAqparat - Qazaqstan men Birikken Arab Ámirlikteri arasyndaǵy ekonomıkalyq baılanystar artyp keledi. Bul týraly búgin Aqordada pen Ábý Dabıdiń murager hanzadasy sheıh Muhammed ben Zaıd ál Nahaıanmen keńeıtilgen quramdaǵy kelissózder ótkizgen Elbasy Nursultan Nazarbaev aıtty, dep habarlaıdy QazAqparat tilshisi.

«Siz ben meniń aramyzdaǵy týysqanshylyq, baýyrlastyq, jıi kezdesýlerdiń arqasynda eki eldiń arasyndaǵy bıznes, iskerlik qarym-qatynas ulǵaıyp kele jatyr. Saýda-sattyǵymyz eki ese artty. Aldymyzda kóp maqsattar bar. Investıtsııany saqtaý týraly kelisimge qol qoıdyq. Qosarlanǵan salyq salmaý máselesin kelistik. Búgin mádenıet jóninde kelisimge qol qoıamyz», - dep atap ótti Elbasy.

Sonymen qatar Memleket basshysy Birikken Arab Ámirlikteri Qazaqstandy Táýelsizdiktiń birinshi kúninen bastap qoldap kele jatqanyn aıtty.

«Jalpy Taıaý Shyǵystaǵy jáne Shyǵanaqtaǵy óte belgili, bedeldi el bolyp kelesizder. Dúnıejúzine belgili saıasat júrgizip otyrsyzdar. Sizdiń elińiz jańalyq pen tehnologııa, ǵylym boıynsha kóp jumys jasap jatqany jóninde málimetimiz bar. Qarym-qatynasymyz ósip keledi. Oǵan rııasyz qarym-qatynasqa qol jetkizgenimiz sebep bolyp otyr. Qurmetti baýyrym, Astananyń 20 jyldyq mereıtoıyna kelip bizdi qýanttyńyz. Astana sizdiń úıińiz, Qazaqstan sizdiń úıińiz. Qaı ýaqytta, qaı jerge kelemiz deseńiz de biz ár ýaqytta qushaq jaıa qarsy alamyz», - dedi Nursultan Nazarbaev.

Qazaqstan Prezıdenti elordada sheıh Halıfanyń tapsyrmasymen qurylystar salynǵanyn, basqa da kómek berilip otyrǵanyn atap ótti.

«Qazir «Ábý Dabı plaza» degen úlken keshen salynýda. Sheıh Mansýrmen jumys istep jatyrmyz. Biraq, onyń qurylysyn kishkene tezdetý kerek. Qurylys sozylyp ketti», - dedi Elbasy.

Qazaqstan Prezıdenti Ábý Dabıdiń murager hanzadasynyń erteń «Astana» halyqaralyq qarjy ortalyǵyna qatysatyndyǵy úshin de rızashylyǵyn bildirdi.