Elbasy sheteldik qazaq balalary úshin stıpendııalyq baǵdarlama engizýdi júktedi
«Shette júrgen aǵaıynnyń urpaǵyna kómek jasaý, ósip kele jatqan jastarǵa qolushyn berý qajet. Biz sheteldegi qazaq baýyrlarymyzdyń balalaryna Qazaqstanda bilim alýlaryna bar jaǵdaılaryn jasaýmyz kerek. Qazir olar grant arqyly elimizdiń joǵary oqý oryndarynda oqı alady, ózderińiz bilesizder. Úkimetke qandastarymyzdyń joǵary bilim alýlaryn qoljetimdi etý úshin, olarǵa bólinetin kvotany eki esege kóbeıtýdi tapsyramyn», - dedi Elbasy.
Memleket basshysy qazir Qazaqstanda bilim men ǵylymǵa óte kóp kóńil bólinip jatqanyn atap ótti. Táýelsizdik jyldar ishinde 1500 mektep salyndy. Kóptegen joǵary oqý oryndary boı kóterdi.
«Dúnıejúzi ýnıversıtetterimen terezesi teń ýnıversıtetter salyndy. Nazarbaev Ýnıversıteti, Qazaq-Brıtan ýnıversıteti, KIMEP degen, IT-tehnologııalar syndy ýnıversıtetter bar. Biraq esterińizde bolsyn, ol ýnıversıtetterge túsý ońaı emes. Egerde bilimi jetpeıtin bolsa, ol balalarǵa birshama daıyndyq oqytýlardan ótkizýimiz kerek. Sebebi qansha oqýǵa alǵanmenen, ıgere almaıtyn bolǵannan keıin, oqýdan shyǵyp ketedi, ony biz bilemiz. Sheteldik qazaq stýdentteri úshin arnaıy stıpendııalyq baǵdarlama engizý kerektigin aıtyp otyrǵanym osydan. Qaı eldiń azamaty bolsa da, elde oqyǵan qazaq balasy erteń, árıne, Qazaqstanǵa qyzmet etedi», - dedi Prezıdent Quryltaıdyń ashylý saltanatynda.
Aıta keteıik, Astanada Elbasynyń qatysýymen Dúnıejúzi qazaqtarynyń V quryltaıy ótýde.