Elbasy «Rothschild & Co» kompanııasynyń basshylarymen kezdesti

ASTANA. QazAqparat - Qazaqstan Prezıdenti «Rothschild & Co» kompanııasynyń basshylary Erık de Rotshıldpen, Klaýs Mangoldpen jáne Djovannı Salvettımen kezdesti, dep habarlaıdy QazAqparat.

Memleket basshysy «Rotshıld» kompanııasynyń qarjy sektoryndaǵy jumys tájirıbesi mol jáne halyqaralyq bedeli bıik ekenin atap ótti.

«Rotshıld» kompanııasy - álemdegi erteden kele jatqan iri qarjy ınstıtýttarynyń biri. Sizderdiń jeke kapıtal salymshylarmen jumys jónindegi tájirıbelerińiz mol. Bul tájirıbe bizdiń elimiz úshin de mańyzdy. Sol sebepti qazir Qazaqstannyń Ulttyq bankine keńes berip otyrsyzdar», - dedi Nursultan Nazarbaev.

Erık de Rotshıld Qazaqstan Prezıdentine kezdesýge múmkindik týǵyzǵany úshin alǵys aıtyp, elimizdiń qarqyndy damyp kele jatqanyna qyzyǵa qaraıtynyn jetkizdi.

«Bul - meniń Qazaqstanǵa alǵashqy saparym. Sońǵy eki kúndegi áserlerim óte jaqsy. Sizdiń arqańyzda bolashaqta elińiz joǵary qarqynmen damıtyn bolady. Qazaqstan geografııalyq turǵydan utymdy jerde ornalasqan. Ol Azııa men Eýropa arasyndaǵy kópir bolyp sanalady. Sizdiń ekonomıkany ártaraptandyrýǵa, ónerkásipti damytýǵa jáne shıkizattyq ekonomıkadan bas tartýǵa jetelegen úrdisterdi aıqyndaı alǵan kóregen qadamyńyz meni tánti etti», - dedi kompanııanyń dırektorlar keńesiniń tóraǵasy Erık de Rotshıld.