Elbasy Reseı Federatsııasy Federaldyq jınalysy Federatsııa keńesiniń tóraǵasy Valentına Matvıenkomen kezdesti
Kezdesýde Nursultan Nazarbaev Qazaqstan men Reseı arasynda barlyq baǵyttar boıynsha yntymaqtastyqty odan ári nyǵaıtýdyń mańyzdylyǵyn atap ótti.
– Reseı bizdiń tatý kórshimiz ári strategııalyq seriktesimiz. Sizdiń saparyńyz parlamentaralyq baılanysty damytyp qana qoımaı, memleketaralyq qarym-qatynasty da nyǵaıta túseri anyq, – dedi Qazaqstannyń Tuńǵysh Prezıdenti.
Valentına Matvıenko Nursultan Nazarbaevty aldaǵy Elorda kúnimen jáne bıyl atap ótilip jatqan Qazaqstan táýelsizdiginiń 30 jyldyǵymen quttyqtady.
– Sizdi kele jatqan Qala kúni meıramymen shyn júrekten quttyqtaımyn. Jas Qazaqstannyń jańa astanasynyń boı kóterýine Ózińiz tikeleı atsalystyńyz. Bıyl Qazaqstan táýelsizdiginiń otyz jyldyǵy atap ótilýde. Otyz jyl qas qaǵym sátteı óte shyqty. Búginde Qazaqstan – postkeńestik keńistiktegi eń tabysty elderdiń biri. Sizder damyǵan memlekettik ınstıtýttary men naryqtyq ekonomıkasy bar egemen el qurdyńyzdar. Osy joldy júrip ótken Qazaqstan ózindik kelbeti, ishki jáne syrtqy saıasaty bar, álemdik qoǵamdastyqta qurmetke ıe memleketke aınaldy, – dedi Federatsııa keńesiniń tóraǵasy.
Valentına Matvıenko Elbasynyń Qazaqstan-Reseı qatynastarynyń qalyptasýy men damýyndaǵy rólin erekshe atap ótti.
– Siz Reseı men Qazaqstan arasynda baılanys ornatýdy árdaıym qoldap kelesiz. Óıtkeni bul Qazaqstannyń strategııalyq, geosaıası jáne ulttyq múddelerine saı. Sizdiń kúsh-jigerińizdiń arqasynda biz memleketaralyq qatynas ornatýdyń tabysty jolynan ótip, tıimdi, teń quqyly, ózara syılastyqqa negizdelgen yntymaqtastyq modelin qurdyq, – dedi Federatsııa keńesiniń tóraǵasy.