Elbasy «Pavlodar munaı hımııasy zaýytyna» bardy

ASTANA. QazAqparat - Memleket basshysy Pavlodar oblysyna jumys sapary barysynda Qazaqstandy ındýstrııalandyrý kartasy aıasynda túbegeıli jańartylǵan ári óndiris úderisi tsıfrlandyrylǵan Pavlodar munaı hımııasy zaýytynyń jumysymen tanysty, dep habarlaıdy Aqordanyń baspasóz qyzmeti.

Qazaqstan Prezıdentine jańartý jumystary zaýyttyń shıki munaıdy qaıta óńdeý ónimdiligin arttyrýǵa, ónim sapasyn K-4 jáne K-5 standarttaryna deıin jetkizýge múmkindik bergeni jóninde málimdeldi. Izomerızatsııalaýdyń jańa avtomattandyrylǵan keshenderi jáne ortalyq basqarý pýnkti arqyly basqarylatyn kúkirt óndiretin qondyrǵylar salyndy.

Nursultan Nazarbaev Qazaqstanda munaı óndirý kóleminiń artýyna baılanysty daıyn ónim kólemin molaıtý úshin ári ony ishki jáne sheteldik naryqtarǵa shyǵarý úshin halyqaralyq standarttarǵa saı keletin munaıdyń qaıta óńdelýin meılinshe jaqsartýdy qolǵa alý qajettigin aıtty. 

Elbasy Qazaqstandaǵy munaı óńdeıtin úsh zaýyttyń jańartylǵanyna qaramastan, tórtinshi zaýyt salý qajettigi týyndap otyrǵanyn atap ótti.

Qazaqstan Prezıdenti zaýyttyń jas jumyskerlerimen áńgimelesý barysynda Pavlodar munaı hımııasy zaýyty Keńes Odaǵy kezinde salynǵan zaýyttardyń sońǵysy ekenin aıtyp, onyń sol ýaqyttaǵy eń ozyq qural-jabdyqtarmen jabdyqtalǵanyna toqtaldy.

«Sizder eń zamanaýı zaýytta jumys isteısizder. Munda óndiristi tsıfrlandyrý isi qolǵa alynyp, jańa tehnologııalar engizilýde. Sizder óndirip jatqan ónimge degen suranys artyp keledi, demek, sizderdiń de tabystaryńyz molaıa túspek», - dedi Nursultan Nazarbaev.

Jas mamandar Memleket basshysyna «Bolashaq» baǵdarlamasy arqyly álemniń úzdik joǵary oqý oryndarynda bilim alýǵa jáne alǵan bilimderin óndiriste qoldanýǵa múmkindik týǵyzǵany úshin alǵys aıtty.