Elbasy Parlament Senaty jumysyna baǵa berdi
«Ótken 30 jyldyń ishinde kópshilikterińizben birge kele jatyrmyz. Qýanyshty da, qıynshylyqty da birge ótkizip, halyqpen birge qyzmet istep, eńbekterińizdi sińirip kelesizder. Men arnaıy qos palataly Parlament quryp, zańdy súzbeden ótkizip, óńirlerdiń túıindi máselelerin eskerý úshin osyndaı qadamdarǵa bardym. Maǵan «Qurmetti Senator» mártebesin berý týraly sheshim qabyldaǵandaryńyz úshin úlken rızashylyǵymdy bildiremin», - dedi Elbasy Parlament Senatynda ótken saltanatty sharada.
Osy oraıda, N. Nazarbaev Táýelsizdik jyldaryndaǵy Qazaqstan Parlamenti jumysyna óz baǵasyn berdi.
«Táýelsizdik jyldary kóptegen oqıǵalar boldy, kóp jumys atqaryldy. Parlament kóptegen zańdardy qabyldady, olardyń ishinde kelispegen zańdarda da boldy. Degenmen de Senat óz jumystaryna úlken jaýapkershilikpen qarap, onyń barlyǵyn ornyna keltirdi», - dedi Tuńǵysh Prezıdent.
Budan buryn habarlanǵandaı, búgin QR Parlamenti Senatynda Tuńǵysh Prezıdent-Elbasy Nursultan Nazarbaevqa «Qurmetti Senator» tósbelgisi men kýáligi tabystaldy.
QR Tuńǵysh Prezıdenti - Elbasynyń demokratııalyq, zaıyrly, quqyqtyq jáne áleýmettik memleket retinde konstıtýtsııalyq-quqyqtyq negizderin qalyptastyrýdaǵy, sondaı-aq otandyq parlamentarızmdi ornyqtyrýdaǵy jáne damytýdaǵy sińirgen tarıhı eńbegin, Konstıtýtsııany, adamnyń jáne azamattyń quqyqtary men bostandyqtaryn qorǵaýǵa, qoǵamnyń birligin qamtamasyz etýge, eldiń strategııalyq damý baǵdaryn aıqyndaýǵa qosqan asa zor úlesin moıyndaı otyryp, QR Parlamenti Senaty Elbasy Nursultan Nazarbaevqa «Qurmetti Senator» mártebesin berý týraly sheshimdi qabyldady.