Elbasy Panfılovqa arnalǵan eskertkishtiń ashylý saltanatyna qatysty (FOTO)
«Bul eskertkish tek Keńes Odaǵynyń Batyry Ivan Panfılovqa ǵana qoıylǵan eskertkish emes. Bul fashızmge qarsy Uly shaıqasqa qatysqan qazaqstandyqtarǵa jáne sol shaıqas alańynda qaza bolǵandar men surapyl soǵystan qaıtyp kelip, elimizdiń damýyna ólsheýsiz úles qosqandarǵa degen máńgilik qurmet belgisi. Ózderińiz jaqsy bilesizder, general-maıor Panfılov basqarǵan 316-dıvızııa Almaty oblysynda qurylyp, soǵystyń eń aýyr kezinde Máskeý túbinde shaıqasty jáne arasynda Keńes Odaǵynyń Batyry Baýyrjan Momyshuly bar 28 panfılovshy-jaýynger Máskeýge tap bergen fashıstik Germanııanyń tankterden quralǵan toptaryn toıtardy", - dedi Memleket basshysy.
«Sondyqtan da Panfılovtyń esimi Uly Otan soǵysy tarıhynda máńgi qalady. Biz - qazaqstandyqtar onyń esimin basqa da 500 qazaqstandyq Keńes Odaǵynyń Batyry men 200 "Dańq" ordeni ıegerlerimen birge qasterleımiz", - dep atap ótti N. Nazarbaev. Aıta keteıik, Keńes Odaǵynyń Batyry, general-maıor Ivan Panfılov eskertkishiniń avtory - músinshi Renat Ábenov. Bıiktigi 2,5 metrdi quraıtyn eskertkish qoladan jasalǵan. Onyń ortasynda gúl shoqtaryn qoıýǵa arnalǵan taqta ornatylǵan. Eskertkishtiń shyǵys betinde Máskeýdi qorǵaýda erlikpen qaza tapqan 28 jaýynger-panfılovshylardyń týǵan, ómirden ótken jyldary jáne aty-jónderi kórsetilip, tabıǵı granıtten jasalǵan estelik taqtalar ornatylǵan. Sondaı-aq Keńester Odaǵy Batyrynyń Altyn Juldyz medali bekitilgen 28 stella jasaldy.