Elbasy otandyq jáne sheteldik BAQ ókilderi úshin brıfıng ótkizdi

NUR-SULTAN. QazAqparat - Elbasy Túrkistanǵa saparynyń qorytyndysy boıynsha otandyq jáne sheteldik BAQ ókilderi úshin brıfıng ótkizdi. Jýrnalıster aldynda sóılegen sózinde qala aýmaǵynda qarqyn alǵan qurylys jumystarynyń aýqymyn atap ótti, dep jazady elbasy.kz.

«Ótken jyly oblys ortalyǵyn kóshirý týraly jarlyqqa qol qoıǵan soń aýqymdy qurylysty bastadyq. Búgin men orasan zor ǵımarattardy aralap kórdim. Kóptegen jańa nysandar boı kóterip, jastar úshin jumys oryndary ashylyp jatyr. Aýrýhanalar, mektepter, qonaq úıler, halyqaralyq áýejaı salynady. Sý resýrstarymen qamtý salasyndaǵy máselelerdi sheshý josparlanǵan», - dedi Nursultan Nazarbaev.

Sonymen qatar, Qazaqstannyń Tuńǵysh Prezıdenti ákimdiktiń ınfraqurylymdyq jobalardy júzege asyrý josparlary týraly aıtty.

«Bir jyl ishinde kóptegen jumys isteldi. Kelesi jyly Ózbekstan, Qyrǵyzstan, Túrkimenstan, Tájikstan basshylaryn sammıtke shaqyrýdy josparlap otyrmyz. Eger olar qatysýdy rastasa, biz ony Túrkistanda ótkizýimiz múmkin. Búkil Qazaqstan jurtshylyǵy Túrkistannyń damýyn qoldap otyr. Árbir úı, árbir qala – bul Qazaqstannyń baılyǵy. Elordany salǵan kezde qarjylandyrýǵa baılanysty suraqtar bolǵan edi. Endi Nur-Sultan qalasy barlyq shyǵyndardy ótep, jyl saıyn bıýdjetke trıllıondaǵan kiris ákelip otyr», - dedi Elbasy.

Sonymen birge, Nursultan Nazarbaev Túrkistan men búkil óńirdiń týrıstik áleýetin damytýdyń mańyzdylyǵyn atap ótti.

«Biz munda kóptep týrısterdi tartýymyz kerek. Búkil túrki álemi Túrkistandy ortalyq dep sanaıdy. Týrızm ­– ekonomıkanyń mańyzdy bóligi. Munda kóptegen murajaılar bar. Qazir «Kúltóbe qalashyǵy» arheologııalyq parkin qurý jumystary júrgizilýde», - dedi Qazaqstannyń Tuńǵysh Prezıdenti.