Elbasy «Otan qorǵaýshylar» eskertkishine gúl shoqtaryn qoıdy

ASTANA. QazAqparat - Búgin Elbasy Nursultan Nazarbaev Uly Jeńistiń 69 jyldyǵyna oraı Astanadaǵy «Otan qorǵaýshylar» eskertkishine gúl shoqtaryn qoıyp, Uly Otan soǵysynda

qaza bolǵan jaýynger qazaqstandyqtardy bir sát únsizdikpen eske aldy. Resmı rásimnen keıin QR Respýblıkalyq úrmeli aspaptar orkestri elimizdiń ánuranyn oryndady. Osydan keıin Qurmetti qaraýyl rotasy QR Qarýly Kúshteriniń Joǵarǵy Bas qolbasshysynyń jáne Uly Otan soǵysy ardagerleriniń aldynda saltanatpen sap túzep júrip ótti.

Sondaı-aq, gúl shoqtaryn qoıý rásimine Uly Otan soǵysynyń ardagerleri, QR Prezıdenti Ákimshiliginiń, QR Úkimetiniń, QR Parlamentiniń, Ortalyq memlekettik organdarynyń, dıplomatııalyq korpýstardyń ókilderi jáne qala jurtshylyǵy qatysty.

Sońǵy derekter boıynsha Qazaqstannan maıdanǵa attanǵan 1 mln. 200 myń jaýyngerdiń 600 myńy soǵystan qaıtyp oralmady. Jalpy, burynǵy Keńes Odaǵynyń 27 mıllıonǵa jýyq adamyn jalmaǵan qandy qyrǵynda elimizden attanǵan 500-den astam jaýynger 1934 jyly bekitilgen eń joǵarǵy ataq - Keńes Odaǵynyń Batyry ataǵyn ıelengen, onyń 100-den astamy - qazaqtar. Sonymen qatar 142 qazaqstandyq Dańq ordeniniń tolyq ıegeri atansa, Keńes Odaǵynyń orden, medaldarymen marapattalǵan qazaqstandyqtar sany 100 myńǵa jýyqtaıdy.

Soǵys ardagerleri jyl ótken saıyn aramyzdan azaıyp barady. Búginde Qazaqstanda 6 myń 700-ge jýyq Uly Otan soǵysynyń ardagerleri bar.