Elbasy Óskemendegi «Sılýmın-Vostok» jaýapkershiligi shekteýli seriktestigine bardy

ASTANA. QazAqparat - Qazaqstan Prezıdenti Nursultan Nazarbaev Shyǵys Qazaqstan oblysyna jumys sapary aıasynda Óskemen qalasyndaǵy ««SV» ónerkásiptik jabdyqtar shyǵaratyn «Sılýmın-Vostok» jaýapkershiligi shekteýli seriktestigi zaýytynyń jumysymen tanysty, dep habarlaıdy Aqordanyń baspasóz qyzmeti.

Kásiporyn qurylys pen ınfraqurylym, mashına jasaý, energetıka, metallýrgııa, taý-ken jáne munaı hımııasy ónerkásibi salalarynda ınjınırıngtik qyzmet kórsetý isine mamandanǵan.

Kásiporyndy aralaý barysynda Memleket basshysyna qubyr júrgizý kezinde qoldanylatyn armatýralardy, nasostyq qural-jabdyqtardy, elektrotehnıkalyq ónim men blokty-modýldik ǵımarattardy daıyndaý úderisi tanystyryldy.

Nursultan Nazarbaev kásiporyn ujymymen de kezdesip, áńgimelesti.

Elbasy Shyǵys Qazaqstan oblysynyń ónerkásiptik áleýeti men damý qarqynyn atap ótti.

«Óńirde ónerkásip salasy órkendep, ındýstrıaldy baǵdarlama aıasynda 46 joba júzge asyryldy. Jańa jumys oryndarymen qamtamasyz etip jatqan kásiporyndar salynýda. Atap aıtqanda, 7500-ge jýyq adam jumysqa ornalasty», - dedi Memleket basshysy. 

Sońynda Nursultan Nazarbaev kásiporyn jumysshylaryna tabys tilep,  óndiristik kórsetkishterdiń odan ári arta berýine nıettestik bildirdi.