Elbasy Ortalyq Azııa elderiniń qarym-qatynasy týraly aıtty

ASTANA. QazAqparat -  Jyl qorytyndysy boıynsha elimizdiń BAQ ókilderimen kezdesý barysynda QR Prezıdenti Nursultan Nazarbaev Ortalyq Azııa elderi arasyndaǵy qarym-qatynas týraly aıtty, dep habarlaıdy QazAqparat.

«Ózara kórshi bes memleket halqynyń dini men dili bir, ıaǵnı bir óńirde turyp jatyrmyz. Bir birimizdiń ózara túsinigimiz bar. Keńes Odaǵy ydyrap, jeke qalǵan kezde osy elderdiń arasyndaǵy yntymaqtyń tyǵyz bolýy qajet edi. Atap aıtqanda, barshamyzǵa tyǵyz qarym-qatynas qaýipsizdikke, ekonomıkaǵa kerek boldy. Sony oılap, birneshe ret tıisti bastamalar jasaǵan bolatynmyn. Osy oraıda Ortalyq Azııada ózimizdiń ekonomıkalyq odaǵymyzdy qurý, shekaramyzdy ashý, saýda-sattyqty damytý, mádenı baılanystardy nyǵaıtý bastamalary usynyldy. Bul baǵyttaǵy qadamdar buzylyp ketti», - dedi Memleket basshysy.

Bul rette Prezıdent ár el táýelsizdigin alǵannan keıin, óziniń damý jolyn izdep, ártúrli baǵytty tańdaǵanyn atap ótti. Sonyń nátıjesinde ıgi bastamalar oryndalmaı qaldy.

Sonymen qatar N.Nazarbaev sońǵy kezderi Ortalyq Azııa elderi prezıdentterimen kezdesýler jıi ótip jatqanyn tilge tıek etti.

«Barlyq osy elderdiń memleket basshylary ózara saparmen bir-birimizdiń elimizge baryp keldik. Qazaqstandaǵy Ózbekstannyń mádenıe kúnderi aıaqtalyp kele jatyr. Aldaǵy jyldyń basynda Qazaqstannyń Ózbekstandaǵy óner kúnderin ótkizýge qatysty qabyldaý ótedi, men ol jerde bolamyn. Tashkentte kezdesý bolady. Qyrǵyz baýyrlarmen de, túrikmendermen de, Tájikstanmen de qarym-qatynasymyz óte jaqsy. Biraq saýda-sattyqtyń jaǵdaıy ártúrli», - dedi Elbasy.