Elbasy ónimderi eksportqa baǵyttalǵan óndiristerdi iske qosty

  ASTANA. QazAqparat - Búgin «Jańa ındýstrııalandyrý: qazaqstandyq barystyń qadamy» ulttyq telekópiri barysynda Memleket basshysy Nursultan Nazarbaev Jambyl jáne Almaty oblystarynyń aýmaǵynda ornalasqan shaǵyn jáne orta bıznes nysandaryn iske qosty, dep habarlaıdy QazAqparat.

«Qurmetti Elbasy! Jańa ınnovatsııalyq tehnologııalar eńbek jaǵdaıyn jaqsartyp, ónimdilikti arttyrady. Ónimimizdiń 60  paıyzy Reseı men TMD elderine jetkiziledi. Biz eksporttyq kórsetkishterimizdi kóterýge nıettimiz», - dedi  «ORGSTROI» JShS bas dırektory Qalı Ǵylymhan.

«PSI STROY INDUSTRIES»JShS-niń basqarýshy dırektory Pavel Beklemıshev Elbasydan jyldyq qýaty 18 myń tonnany quraıtyn sapasy joǵary metall qurylǵylaryn shyǵaratyn jańa óndiristi iske qosýdy surady.

«Biz kásiporyndy damytýdy jalǵastyrýdamyz. Biliktiligi joǵary dánekerleýshilerdi daıyndaıtyn oqý ortalyǵynyń qurylysy aıaqtalýǵa jaqyn. Ortalyqty qurýda shvedtiń dánekerleý qural-jabdyqtaryn shyǵaratyn kompanııasy boldy. Bizdiń kásipornymyz el ekonomıkasynyń damýyna laıyqty úles qosaryna senimdimiz», - dedi ol.

Al «Korınskaıa GES» JShS-niń bas dırektory Vıktor Sychev Qazaqstan Prezıdenti qoldaýynyń arqasynda elimizde júzdegen myń bıznesmender qoldaýǵa ıe bolyp otyrǵandyǵyn aıta kele, shaǵyn jáne orta bıznestiń 3 jańa jobasyn iske qosýdy surady.

Óz kezeginde Qazaqstan Prezıdenti Jambyl men Almaty oblystarynyń aýmaǵynda ornalasqan óndiris oryndarynyń iske qosylýyna ruqsat berdi.