Elbasy: OA elderiniń arnaıy qyzmetteri yntymaqtastyqty jandandyratyn bolady

ASTANA. QazAqparat - Ortalyq Azııa elderiniń arnaıy qyzmetteri yntymaqtastyqty jandandyratyn bolady. Bul týraly búgin Aqordada ótken Ortalyq Azııa elderi basshylarynyń jumys (konsýltatıvtik) kezdesýi qorytyndysyna oraı BAQ ókilderine arnalǵan baspasóz máslıhatynda Qazaqstan Prezıdenti Nursultan Nazarbaev aıtty, dep habarlaıdy QazAqparat tilshisi.

«Qazirgi ýaqytta oryn alyp otyrǵan ishki problemalardy biz úshin eshkim de sheship bermeıdi dep kelistik. Eń aldymen, qaýipsizdikti qaradyq. Qazir Aýǵanstanda oryn alyp jatqan oqıǵalar bizdi qatty alańdatady. Eger memleketterimizdiń arnaıy qyzmetteri tyǵyz yntymaqtastyqta bolsa, onda biz lańkester, esirtki tasymaly, dinı ıslamshylar jáne basqalary týraly bárin biletin bolamyz. ıAǵnı, terrorızm, dinı ekstremızm, zańsyz qarý-jaraq saýdasy, uıymdasqan qylmys - munyń barlyǵynyń jolyn kesý qajet», - dedi Nursultan Nazarbaev.

Elbasynyń atap ótýinshe, osy maqsatta naýryz aıynyń sońynda Ózbekstanda joǵary deńgeıdegi konferentsııa ótkizý josparlanǵan.

«Bizdiń barlyq memleketterimiz sheshim qabyldaıtyn bolady. Ózderińiz de biletindeı, bul máselelermen UQShU aıasynda da aınalysamyz. Reseımen de tyǵyz baılanys bar. Bul atalǵan jumystaǵy mańyzdy sát», - dedi Elbasy.

Munan bólek Qazaqstan Prezıdenti Sırııada jeńilis tapqan DAISh (Qazaqstan jáne birqatar ózge memleketter aýmaǵynda tyıym salynǵan) qazirgi ýaqytta «uıqydaǵy» uıymdar quryp jatqanyn atap ótti.

«Al ol jaqtaǵy soǵysqa bizdiń barlyq elderimizdiń azamattary qatysty. Endi olar oralyp jatyr. Bizge bul iste barynsha qyraǵy bolý qajet», - dedi Nursultan Nazarbaev.