Elbasy «Nurly jol» baǵdarlamasyn kreatıvti jastar atqaratyndyǵyna senedi. - Á.Saparbaev
«Álemdi óz turaqtylyǵy, kelisimi jáne beıbitshiligimen tamsandyrǵan elimizdiń kreatıvti jastary aldaǵy ýaqytta «Nurly jol» bastamalaryndaǵy sharalardy barlyq kúsh-jigerimen atqaratyndyǵyna senedi»,- deıdi professor.
Professor Á.Saparbaevtiń pikirinshe, jastardyń elge, jerge degen súıispenshiligin arttyryp, patrıottyq sezimderin ushtaıtyn is-sharalar da memlekettik baǵdarlamada kórinis tapqan. «Elimizdiń áleýmettik-saıası ómiri men jaǵdaıy sıpattalatyn baǵdarlamanyń ózindik salmaqty júgi bar. Jańa qazaqstandyq patrıotızm ıdeıasynan bastaý alatyn «Máńgilik El» jalpyulttyq ıdeıasy nurly jolmen jalǵaspaq. Qazaq handyǵynyń 550 jyldyǵy, Qazaqstan halqy Assambleıasy men Konstıtýtsııanyń 20 jyldyǵy, Uly Jeńistiń 70 jyldyǵy merekelenetin jylda Joldaý qaǵıdalary sátti júzege asatyndyǵyna senimimiz mol», deıdi ekonomıst.
Qazirgi tańda elimizde adam kapıtalyn jáne ıntellektýaldy ult qalyptastyrý úrdisi júrip jatqany anyq. Bul úrdis el jastarynyń álemdik básekege shydas berip, halyqaralyq standarttardyń boılaryna sińirýi úshin jasalyp jatqan qadamdaryń biri. Al, «Nurly jol» baǵdarlamasy osy úrdistiń tek zańdy jalǵasy bolyp, ǵylym men bilimniń jandanýyna úles qosady dep esepteıti professor Saparbaev.
«Mektepke deıingi bilim berý men tárbıeden bastap, joǵary bilim berý júıesiniń barlyq deńgeılerinde oqytý men tárbıeleý úderisiniń adam kapıtalyn damytýǵa baǵyttalýy eldigimizdiń belgisi desek artyq emes. Búgingi tańda qalyptasqan eńbek naryǵynda bilimdi, shyǵarmashylyq túrde kreatıvti oılaı alatyn, ıntellektýaldyq áleýeti joǵary, alǵan bilimin kez kelgen salada qoldana alýǵa qabiletti mamandar daıyndaý joǵary oqý oryndarynyń basty maqsaty bolmaq. Bilim salasyndaǵy olqylyqtardy joıý maqsatynda Elbasy Úkimetke bul salaǵa qosymsha 70 mlrd. teńge kóleminde qarjy bólýdi tapsyrdy. Mektepke deıingi bilim berý salasyna da úsh jyldyń ishinde qosymsha 20 mlrd. teńge qarjy bólinetin boldy. Elimizdegi 10 joǵary oqý orny ındýstrııalandyrý baǵdarlamasy aıasynda ǵylym men ekonomıka salalarynyń baılanysyn qamtamasyz etetin jáne mamandar daıarlaıtyn joǵary oqý oryndaryna aınalmaq. Elbasy «Nurly jol» Joldaýynda bul máselege de kóregendikpen qarap, 10 joǵary oqý ornynyń materıaldyq-tehnıkalyq bazasyn qalyptastyrýǵa 2017 jylǵa deıin 10 mlrd. teńge qarjy bólýdi Úkimetke júktedi. Mundaı qamqorlyq, bilim-ǵylym salasyna degen Prezıdentimizdiń erekshe nazary joǵary oqý oryndary ujymdarynyń qyzmetine jańa serpilis beredi jáne jańa belesterdi alýǵa umtyldyrady».
Sonymen birge, elimizdiń JOO-ǵy ǵylym men bilim sapasyn jetildirý úshin elbasy ártúrli salalyq bilim men ǵylymnyń ıntegratsııalanýyna qatysty birqatar naqty sharalar da «Nurly jol» baǵdarlamasynda qamtylǵan bolatyn.
Bul týraly professor Ábdijapar Saparbaev bylaı deıdi: «Elbasy óz sózinde elge ǵylymı-tehnıkalyq qyzmettiń nátıjesin kommertsııalaýdyń tıimdi júıesiniń asa qajet ekendigin atap ótken bolatyn. Bul júıe damýynyń mańyzdy quramy ǵylym men bıznes arasyndaǵy myqty baılanys bolyp tabylady. Ǵylym men bıznes arasyndaǵy baılanystyń damýyna qolǵabys etý maqsatynda Bilim jáne ǵylym mınıstrligi Dúnıejúzilik banktiń qatysýymen Tehnologııalardy kommertsııalaý jobasyn júzege asyrýda jáne onyń sheńberinde «Tehnologııalardy kommertsııalaý ortalyǵy» qyzmet etýde. Atalǵan júıeni damytýdyń mańyzdy quramdas bóligi ǵylym men bıznestiń arasyndaǵy baılanys bolyp tabylady. 2011-2014 jyldary osy joba sheńberinde 65 ǴZTKJ jobasy jáne 16 ınnovatsııalyq grant jobalary 6mlrd.teńgenden astam joba iske asyrylýda. Sondyqtan jastar qoǵamnyń qozǵaýshy kúshi retinde elimizdegi turaqtylyq pen tatýlyqty, halyqtar arasyndaǵy yntymaqtastyqty saqtaı bilýge, ata-baba dástúrin jalǵastyryp, ótken tarıhty qurmettep, búgingi bolashaqqa úlken senim artýy tıis».
Qazaqstan saıasatynyń jastarǵa nelikten kóp kóńil bólýi tıis ekenin ekonomıst bylaısha túsindirdi: «Óıtkeni Qazaqstanda jastar arasyndaǵy ózara tatýlyq, bir-birine degen dostyq pen syılastyq joǵary oqý oryndarynda bilim alýshylardy aýyzbirlikke tárbıelep, Máńgilik el ıdeıasyn júzege asyrýǵa jol ashady. Álemdegi bolyp jatqan túrli daǵdarystarǵa moıynsunbaı, ekonomıkasy turaqty damyp kele jatqan memleketimizdiń ustanǵan baǵyt-baǵdaryna shetelderde de úlken qyzyǵýshylyq bar».