Elbasy Nurlan Noǵaevqa: Atyraýlyq dárigerlerge jurttyń kóńili nege tolmaıdy

ATYRAÝ. QazAqparat - Atyraý oblysynyń áleýmettik-ekonomıkalyq damý məseleleri jóninde keńes barysynda Memleket basshysy Nursultan Nazarbaev óńir dárigerleriniń qyzmetine jurtshylyqtyń kóńili tolmaıtyndyǵyn aıtty, dep habarlaıdy QazAqparat tilshisi.

«Dáriger kadrlarmen qamtamasyz etý bar. Biraq, maǵan kelip túsken aqparattar boıynsha baratyn jurt dárigerlerdiń qyzmetine kóńilderi kónshimeıdi. Sondyqtan adamdar kóbinese syrtqa baryp emdelgisi keledi. Bul másele qaıdan shyǵady? Bylaı qarasań barlyǵy bar. Ólim kórsetkishi tómendedi, bala ólimi 30-dan 12-ge tústi. Týberkýlez Atyraýda ótkir turatyn úlken másele edi. Ol 100 myń adamǵa shaqqanda 18 boldy. Qaterli isik 2 esege tómendedi. Osynyń barlyǵy medıtsına salasynyń istep jatqan jumysy emes pe? Nelikten mundaı aryzdar bar?»,- dep surady Nursultan Nazarbaev Atyraý oblysynyń ákimi Nurlan Noǵaevtan.

Óz kezeginde óńir basshysy oblys halqynyń kezinde Astrahanǵa attanyp, sol jaqtyń medıtsınasyna júgingendigin jasyrmady.

«Qazir kadrmen qamtamasyz etý barysynda ýnıversıtetti bitirgen jas mamandy ǵana emes tájirıbeli mamandardy da shaqyryp jatyrmyz. Jaǵdaıdy ózgertýge tyrysýdamyz. Qazir bul tapsyrmany dárigerler biledi. Materıaldyq-tehnıkalyq jabdyqtaý qajetti deńgeıde, qarajat ta bólinip jatyr»,- dedi ol.