Elbasy «Nur Otan» fraktsııasy depýtattarynyń aldyna naqty mindetter qoıdy
Jıyndy ashqan Elbasy fraktsııa depýtattaryn kezekti Parlament saılaýynda «Nur Otan» partııasynyń jeńiske jetýimen taǵy da quttyqtady.
– Biz jurtshylyqtyń senimin aqtaýymyz kerek. Bul – óte mańyzdy mindet ári úlken jaýapkershilik. Sondyqtan bizdiń partııamyzdyń saılaýaldy baǵdarlamasynda aıqyndalǵan mindetterge qol jetkizý úshin fraktsııa depýtattary baryn salýǵa tıis, – dedi Nursultan Nazarbaev.
Qazaqstannyń Tuńǵysh Prezıdenti elimizdiń ornyqty damýy men halyqtyń ál-aýqatyn arttyrýdy qamtamasyz etý boıynsha partııa jumysynyń nátıjelerine toqtaldy.
– Damyǵan 30 eldiń qataryna qosylý úshin bizdiń naqty josparymyz bar, resýrs ta jetkilikti. Osy jolda Parlamenttegi eń úlken fraktsııa retinde basty jaýapkershilik sizderge júkteletin bolady. Alǵa qoıǵan maqsattarǵa qol jetkizý úshin aıanbaı eńbek etesizder degen senimdemin. Barshańyzǵa belgili, depýtattar quramy birshama ózgerdi. Jańa adamdar jańa ıdeıa ákeledi jáne Parlamenttiń qyzmetine tyń serpin beredi dep sanaımyn, – dedi Partııa Tóraǵasy.
Nursultan Nazarbaev Májilistiń jetinshi shaqyrylymynyń jumysy Táýelsizdiktiń 30 jyldyǵymen tuspa-tus kelýiniń sımvoldyq máni zor ekenin atap ótti.
– Ótken saılaýda jurtshylyq bizdiń partııamyzǵa úlken senim bildirdi. Halyqaralyq baıqaýshylar qazaqstandyqtardyń joǵary belsendiligi men uıymshyldyǵyn atap ótti. Saılaý ashyq ári demokratııalyq talaptarǵa saı ótti. Osy joly da «Nur Otan»-nyń naqty ister partııasy ekenin dáleldeı alasyzdar dep kámil senemin, – dedi Elbasy.
Qazaqstannyń Tuńǵysh Prezıdenti Májilistiń ótken shaqyrylymynyń jumys nátıjelerine toqtalyp, Parlament depýtattary men Úkimet músheleri qoıan-qoltyq jumys istegenin aıtty.
– Fraktsııanyń tıimdi jumysyn qamtamasyz etý úshin birneshe mindetti sheshken jón. Birinshiden, depýtattar Úkimetpen birlese otyryp, jurtshylyq tarapynan qoldaý tapqan partııanyń saılaýaldy baǵdarlamasynyń nátıjeli júzege asyrylýyn qamtamasyz etýi kerek. Ekinshiden, depýtattar bıýdjet qarajatynyń tıimdi jumsalýyna baqylaýdy kúsheıtýge tıis. Úshinshiden, barlyq áleýmettik toptarmen keri baılanysty nyǵaıtqan abzal. Depýtattar turaqty túrde turǵyndarmen kezdesip, azamattardy qoǵamdyq qabyldaýlarda qabyldap otyrýy qajet, – dedi Nursultan Nazarbaev.
Otyrys barysynda «Nur Otan» partııasynyń Tóraǵasy jetinshi shaqyrylymdaǵy Parlament Májilisindegi partııa fraktsııasynyń jetekshisi qyzmetine Nurlan Nyǵmatýlındi usyndy. Depýtattar Elbasy usynysyn bir aýyzdan qoldady.
Sondaı-aq Qazaqstannyń Tuńǵysh Prezıdenti Konstıtýtsııaǵa jáne «Parlament jáne onyń depýtattarynyń mártebesi týraly» konstıtýtsııalyq zańǵa sáıkes fraktsııa depýtattary Májilis Tóraǵasy, onyń orynbasarlary men Parlamenttiń tómengi palatasynyń turaqty komıtetteriniń tóraǵalary laýazymyna kandıdattardy usyný jáne bekitý protsedýrasyna qatysýy kerek ekenin atap ótti. Osyǵan baılanysty Nursultan Nazarbaev Parlament Májilisiniń basshylyq laýazymdaryna kandıdatýralardy talqylaýdy usyndy.
Otyrys barysynda Májilistegi basshylyq laýazymdarǵa kandıdattardy usyný boıynsha fraktsııanyń ortaq ustanymy ázirlendi. Oǵan sáıkes Májilis Tóraǵasy qyzmetine N.Nyǵmatýlın, Májilis Tóraǵasynyń orynbasarlary qyzmetine P.Kazantsev pen B.Kesebaeva, Áleýmettik-mádenı damý komıtetiniń tóraǵasy qyzmetine J.Nurmanbetova, Zańnama jáne sot-quqyqtyq reforma komıtetiniń tóraǵasy qyzmetine Q.Mýsın, Qarjy jáne bıýdjet komıtetiniń tóraǵasy qyzmetine M.Qusaıynov, Halyqaralyq ister, qorǵanys jáne qaýipsizdik komıtetiniń tóraǵasy qyzmetine A.Quspan, Ekonomıkalyq reformalar jáne óńirlik damý komıtetiniń tóraǵasy qyzmetine A.Raý usynyldy.
Sonymen qatar Elbasy bolashaq Premer-Mınıstrdiń kandıdatýrasy týraly aıtty.
– Meniń oıymsha, sabaqtastyqty saqtaǵan jón. Qıyndyqtarǵa qaramastan, Úkimet óz jumysyn jaqsy atqardy. Ózge eldermen salystyrǵanda biz jaqsy nátıje kórsettik. Eger Prezıdent Mamın Asqar Uzaqbaıulyn usynsa, onda men sizderden onyń kandıdatýrasyn qoldaýlaryńyzdy suraımyn, – dedi Nursultan Nazarbaev.
Sońynda Qazaqstannyń Tuńǵysh Prezıdenti jıynǵa qatysýshylardy taǵy da ótken saılaýdaǵy aıqyn jeńispen quttyqtap, fraktsııa depýtattaryna tabysty jumys tiledi.
– «Nur Otan» partııasynyń depýtattyq fraktsııasy árdaıym Parlamenttegi jetekshi saıası kúsh bolyp keledi. Aldaǵy ýaqytta da solaı bolaryna senimim mol, – dedi Nursultan Nazarbaev.