Elbasy Nazarbaev Ýnıversıteti qalaı damıtynyn aıtty
«2010 jyly elimizde jańa ýnıversıtettiń negizi qalandy. Osyndaı ýnıversıtettiń bolýyn armandadym. Táýelsiz elimizde, jańa elordada maman daıyndaıtyn, jastardy ǵylymǵa baýlıtyn oqý orny kerek boldy. Bar-joǵy 10 jyldyń ishinde bizdiń negizgi maqsattarymyz oryndaldy. Nazarbaev Ýnıversıteti (Nazarbayev University) ınnovatsııalyq klaster retinde tolyq qalyptasyp otyr. Búginde oqý orny bilim jáne ınnovatsııany biriktirip, halyqaralyq moıyndaýǵa ıe bolǵan zertteý ortalyǵyna aınaldy»,- dedi Elbasy óziniń quttyqtaýynda .
Osy oraıda Tuńǵysh Prezıdent bul oqý ornyna mektepti úzdik bitirgen, ǵylymǵa beıim talantty jastar úlken konkýrstan ótip túskenin atap ótti. Munda ǵylymmen aınalysý úshin qolaıly jaǵdaı jasalǵan.
Sonymen qatar Elbasy osy jyldary 5 myńǵa jýyq adam oqý ornynyń túlegi atanǵanyn, onyń barlyǵy ózderin suranysqa ıe maman retinde kórsetkenin jetkizdi.
«Ýnıversıtettiń damýy jalǵasady. Startaptar úshin arnaıy zerthanalardy damytamyz. Bolashaqta jobasyn júzege asyrýǵa nıetti jas ǵalymdarǵa kómektesip, olardy óndiriske shyǵarý baǵytynda venchýrlyq qorlar quramyz. Bul oqý ornyn qurý kezinde oǵan kóshbasshylardyń jańa býynyn oqytý mindeti júkteldi. Ǵylym, tehnologııalar, kásipkerlik, medıtsına, memlekettik basqarý jáne basqa da salalarǵa tyń serpin ákeletin maman daıarlaý kózdeldi. Aldymyzǵa qoıǵan bul maqsatqa da qol jetkizdik», - dedi QR Tuńǵysh Prezıdenti.
N. Nazarbaev búginde ýnıversıtet túlekteri elimizdiń jańa ıntellektýaldy elıtasyn qalyptastyryp jatqanyn qadap aıtty.
«Meniń de armanym sol edi. Qazaqstanda osyndaı oqý orny bolǵanyna qýanyshtymyn. Elimizdi jarqyn bolashaqqa bastap, Qazaqstannyń damýy men órkendeýin qamtamasyz etetin bolasyzdar. Barshańyzdy Nazarbaev Ýnıversıtetiniń 10 jyldyq mereıtoıymen shyn júregimnen quttyqtaımyn!», - dedi Elbasy.
Budan buryn habarlanǵandaı, Elbasy Nursultan Nazarbaev Nazarbayev University túlekteri men professor-oqytýshylar quramyn oqý ornynyń 10 jyldyq mereıtoıymen quttyqtady .