Elbasy mýzeıiniń jańa ǵımaratynda qandaı jádigerler bar
Úsh qabatty ǵımarattyń jalpy aýmaǵy 40 myń sharshy metrden asady, ony «SEMBOL» túrik kompanııasy salǵan. Kireberis vestıbıýldiń bıiktigi 18 metrge jetedi. Mýzeıdi jobalaýda sáýletshiler aq tas pen móldir áınekke basymdyq berip, zamanaýı sáýlettiń sulýlyǵy men jańa tehnologııalyq sheshimderdi biriktirgen. Mýzeı aınalasyndaǵy saıabaqty da erekshe atap ótýge bolady. Mundaǵy alýan túrli aǵashtar men yńǵaıly joldar elorda qonaqtary men turǵyndarynyń súıikti demalys ornyna aınalýda.
Mýzeı ekspozıtsııalarynda Elbasy N.Á. Nazarbaevtyń ómiri men qyzmeti arqyly Qazaqstan azamattarynyń eńbegi men jetistikteri kórsetilgen. Birinshi qabatta mýzeı ekspozıtsııalary, kórme zaldary, mýzeı qory qoımasy, kitaphana jáne ınteraktıvti oqý zaly ornalassa, ekinshi qabatta – shara ótkizýge arnalǵan eki myń oryndyq kópfýnktsıonaldy zal, úshinshi qabatta – kovorkıng ortalyǵy men ákimshilik keńseler ornalasqan.
Atrıýmǵa kirgende Elbasy N.Á. Nazarbaevtyń BUU Bas Assambleıasy men Qaýipsizdik Keńesiniń resmı qujaty mártebesin alǵan «Álem. XXI ǵasyr» manıfesin kórýge bolady. Osylaısha Tuńǵysh Prezıdent arqyly bizdiń elimiz halyqaralyq qaýymdastyqqa beıbitshilik pen jasampazdyqqa umtylysyn kórsetti.
Mýzeıde 7 zal ornalasqan jáne onyń birinshisi «Elbasynyń balalyq shaǵy» jáne «Tulǵanyń qalyptasý joly» dep atalady. N. Nazarbaev 1940 jyly 6 shildede Almaty oblysy Qaskelen aýdany Shamalǵan aýylynda dúnıege kelgen. Zalda qazaqstandyq sýretshilerdiń Elbasynyń ata-anasy Ábish jáne Áljan Nazarbaevtar beınelengen týyndylary qoıylǵan. Klassıkalyq ekspozıtsııalyq sheshimder men zamanaýı tehnologııalardyń sıntezi arqyly munda Elbasynyń tulǵa bolyp qalyptasqan dáýiri jańǵyrtyldy. Zalda Elbasynyń balalyq shaǵy, mekteptegi jyldary, eńbek jolynyń bastalýy men saıası mansap kezeńderin kórýge bolady.
Sonymen birge, bul zalda N. Nazarbaevtyń shejiresinen bastap, mektep pen ýchılışedegi, ınstıtýt pen jumys ornyndaǵy jetistikterin, belsendi partııalyq-komsomol jumystary men Qazaq SSR mınıstrler keńesiniń tóraǵalyǵy, Qazaqstan Kompartııasy OK birinshi hatshylyǵy jáne el prezıdenttigine deıingi kezeńderdi tamashalaýǵa bolady.
Mýzeıdegi ekinshi zal «Prezıdent joly» dep atalady. Bul zal 1992 jyly 4 maýsymda qabyldanǵan elimizdiń memlekettik rámizderimen ashylady. Odan bólek, Konstıtýtsııa men Qazaqstan áskeri, Altyn adam, teńgeniń shyǵarylýy jáne Qazaqstan halqy assambleıasynyń qurylýy týraly arnaıy vıtrınalar jabdyqtalǵan.
Bul zalda elimizdiń kópvektorly saıasat ustanymyn kórsetetin karta ornalasqan. Táýelsizdik jyldary Qazaqstan álemniń 183 elimen dıplomatııalyq qarym-qatynas ornatqan. Bizdiń elimiz 54 halyqaralyq jáne 8 óńirlik uıymdarǵa múshe.
Úshinshi zal «Strateg joly» dep atalady, munda Elbasynyń astanany aýystyrý týraly mańyzdy sheshiminen bastap, elordanyń bas jospary, 2030 jylǵa deıingi joldardyń damýy kórsetilgen. Zal ortasynda «Qalanyń damýy» meppıng-shoýy kórsetiledi. Medıa-stolda planshetter arqyly el astanasynyń arhıvtik qujattary men foto-vıdeo materıaldary qoljetimdi. Arnaıy ınfografıka arqyly Qazaqstannyń halyq sany, jumyspen qamtý, ulttyq ekonomıka, ónerkásip, saýda, kólik, qurylys, týrızm, qorshaǵan orta jáne bilim salalaryndaǵy ósý qarqynyn kórýge bolady.
«Jahandyq kóshbasshy joly» dep atalatyn tórtinshi zalda Qazaqstannyń ıadroǵa qarsy jahandyq qozǵalys jetekshisi ekeni, qazaqstandyq etnıkaaralyq jáne konfessııaaralyq kelisim úlgisiniń dúnıe júzinde moıyndalǵany aıtylady. «Álem tanyǵan kóshbasshy» fotogalereıasynda N. Nazarbaevtyń ózge elderdiń kóshbasshylarymen túsken sýretteri toptastyrylǵan. Jer shary maketinde N. Nazarbaevtyń BUU Bas assambleıasynda sóılegen sózderi kórsetiledi.
ıAdrolyq qarýsyzdaný isindegi jáne beıbit bastamalardy ilgeriletýdegi eńbegi úshin Elbasy kóptegen memlekettik jáne qoǵamdyq nagradalarmen marapattaldy. Tıisinshe mýzeıge Ulybrıtanııanyń Áýlıe Mıhaıl jáne áýlıe Georgıı ordeni, «Shyǵys-Batys» ınstıtýtynyń Beıbitshilik jáne preventıvti dıplomatııasy syılyǵy, «Hırosıma qalasynyń erekshe qurmetti azamaty» belgisi, «NTI» qory T.Ternerdiń arnaıy syılyǵy qoıylǵan.
«Elbasy jáne ózge elderdiń kóshbasshylary» fotogalereıasynda 700 fotosýret arqyly Qazaqstannyń dıplomatııalyq tarıhynyń ózindik jylnamasy qalyptasqan. Sondaı-aq, osy zalda Elbasyǵa syılanǵan dıplomatııalyq syı-sııapattar jáne qarý-jaraq toptamasy qoıylǵan.
Besinshi zal «Danyshpan joly» dep atalady jáne munda «Qazaqstan-2030» Memlekettik strategııasyna qatysty kórneki buıymdar qoıylǵan. Máselen, taý-metallýrgııalyq keshen eldegi negizgi salalardyń biri bolyp sanalady, allıýmınıı qory boıynsha Qazaqstan TMD elderi arasynda ekinshi oryn alady. Mashına jasaý men munaı-gazdy da ekonomıkany arttyratyn draıver dep ataýǵa bolady. Elbasy strategııasynyń taǵy bir basymdyǵy – sapaly bilim men densaýlyq saqtaý bolatyn. Bul rette 1993 jyly N. Nazarbaevtyń bastamasymen «Bolashaq» stıpendııasy bekitildi. 2019 jyly «Qazaqstannyń 100 jańa esimi» jobasy júzege asty.
Sonymen birge, osy zalda keleshek ǵalymdar men zertteýshilerge mura retinde Elbasynyń tańdamaly eńbekteri qoıylǵan. Elbasy eńbekteri álemniń 30-dan astam tiline aýdarylǵan jáne sheteldik oqyrmandar arasynda da tanymal. QR Tuńǵysh Prezıdenti – Elbasy kitaphanasynyń qorynda ózge memleketter basshylary men qoǵam qaıratkerleri N. Nazarbaevqa syılaǵan kitaptar da qoltańbalarymen saqtaýly.
Zal ortasynda «Qazaqstan-2050» strategııasyna oryn berilgen. 2012 jyly jeltoqsanda N. Nazarbaev Qazaqstan Respýblıkasynyń 2050 jylǵa deıingi Damý strategııasyn usyndy. Onyń basty maqsaty – myqty memlekettiń, damyǵan ekonomıkanyń jáne jalpyǵa ortaq eńbek negizinde berekeli qoǵam qurý, Qazaqstandy álemniń eń damyǵan otyz eliniń qataryna qosý. Osy maqsatta «Qazaqstan-2050» Strategııasy uzaqmerzimdi jeti basymdyqty iske asyrýdy kózdeıdi. Strategııanyń mazmuny men bólimderi mýltımedııalyq formatta usynylǵan.
Altynshy zalda Qazaqstannyń táýelsizdik alǵan sátten bergi júrip ótken joly shoý túrinde kórsetiledi. Al sońǵy jetinshi zal «Qazaqstannyń maqtanyshy dep atalady. Mýzeı ekspozıtsııalarynan bólek, kelýshiler ózderin hokkeı, boks, velosport nemese aýyr atletıka boıynsha jarys qatysýshysy retinde sezinip, eldegi sport pen mádenıettiń damýy týraly paıdaly aqparat ala alady.
«Qazaqstannyń sporttyq dańqy» bóliminde Qazaqstannyń sporttaǵy jetistikterin jáne Jaqsylyq Úshkempirov, Bekzat Sattarhanov, Serik Sápıev, Aleksandr Vınokýrov, Dáýlet Turlyhanov, Dmıtrıı Balandın jáne Denıs Tenge arnalǵan vıtrınalar men marapattaryn, jeke buıymdaryn tamashalaýǵa bolady. «Keleshektegi sport juldyzy» fotoaımaǵynlda kez kelgen qonaq qurmet tuǵyryna shyǵyp, estelikke sýretke túse alady.
«Qazaqstannyń mádenıeti» bóliminde kıiz úı men ulttyq mýzykalyq aspaptar qoıylǵan taǵy bir foto-zona bar. Aqparattyq bólimshede Qazaqstannyń uly kompozıtorlary, mýzykanttary, jazýshylary, sýretshileri, sáýletshileri men ǵalymdary týraly málimetter jınaqtalǵan. Munda Ámire Qashaýbaev, Kúlásh Baıseıitova, Álibek Dinishev, Ermek Serkebaev, Bıbigúl Tólegenova, Roza Baǵlanova jáne Dımash Qudaıbergen syndy ótken jáne qazirgi zamanǵy oryndaýshylardyń ánin tyńdaýǵa bolady. Odan bólek, qobyz, dombyra, jetigen syndy ulttyq aspaptarǵa arnaıy ınstallıatsııa ashylǵan.