Elbasy monopolııaǵa qarsy komıtet basshysyna sógis jarııalady

ASTANA. QazAqparat -Memleket basshysy Nursultan Nazarbaev  QR UEM Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń tóraǵasy Azamat Maıtıevke sógis jarııalady, dep habarlaıdy QazAqparat.

Búgin Aqordada Qaýipsizdik keńesiniń otyrysynda Prezıdent Energetıka mınıstrligi, Ulttyq ekonomıka mınıstrligi jáne monopolııaǵa qarsy vedomstvo basshylarynyń baıandamalaryn tyńdady.

Elbasy 2009 jyly Qazaqstanda «Investıtsııa ornyna - tarıf» jobasy qabyldanǵanyn, jeti jyldyń ishinde ol monopolısterge ózderiniń óndiristerin jańǵyrtý úshin mıllıardtaǵan qarjy tabýǵa múmkindik bergenin atap ótti. Alaıda ınvestıtsııalaý men qýattardy jańartýdyń ornyna iri energetıkalyq kompanııalar tutynýshylar esebinen zańsyz túrde dáýletin arttyryp kelgen. Osy oraıda Prezıdent tarıfterdi zańsyz kótergen monopolısterdi jazalaýdy talap etti.

«Másele osynshalyqty ózekti bolyp tur. Monopolııaǵa qarsy komıtet tóraǵasy, osy máseleni túzete alasyń ba? Álde, qyzmetińnen ketesiń be?», - dedi Prezıdent Komıtet tóraǵasy Azamat Maıtıevke qarata aıtqan sózinde.

Óz kezeginde vedomstvo basshysy salada týyndaǵan jaǵdaıdy túzetýge qaýqarly ekenin jetkizdi.

 Sonymen qatar Ulttyq ekonomıka mınıstri Tımýr Súleımenov óziniń baǵynyshty qyzmetkeri atalǵan máseleni sheshetinin aıtyp, oǵan bolysty.

«Onda sógis jarııalaýmen shekteleıik. Jaǵdaıdy rette, kinálilerdi jazaǵa tart. Osydan keıin qabyldanǵan sharalardy maǵan baıanda», - dedi Nursultan Nazarbaev QR UEM basshysyna.

Jalpy, Prezıdent búgingi otyrysta memorgandar basshylaryna sońǵy eskertý jasady.

«Osy is boıynsha Bozymbaev ta (Energetıka mınıstri), Ekonomıka mınıstrligi men monopolııaǵa qarsy komıtet te qatań jazaǵa laıyqty. Barlyǵyna eskertý jasaımyn. Kelesi joly tıisti sharalar qabyldanady», - dep túıdi Memleket basshysy.