Elbasy mınıstr Muhamedıulyna: Suraq qoıam dep pálege qalasyń

  ASTANA. QazAqparat - Elordany odan ári damytý máselelerine qatysty ótip jatqan májiliste Elbasy Nursultan Nazarbaev qaladaǵy sporttyq jáne kontserttik alańdaryn tıimdi paıdalaný máselesin kóterdi, dep habarlaıdy QazAqparat.

Májilis barysynda Memleket basshysy elordanyń barlyq sporttyq, kontsert alańdaryn tolyqtaı paıdalaný qajettigin eskertti. Osy oraıda ornynan turǵan Mádenıet jáne sport mınıstri Arystanbek Muhamedıuly elordada týrızmdi damytýǵa baǵyttalǵan júıeli sharalardyń iske asyrylyp jatqanyn baıandady. 

«Astana qalasynyń ákimdigi Úkimetpen birigip, «Astana týrızmin damytýdyń 2020 jylǵa deıingi jol kartasyn» qabyldadyq. Aı saıyn týrızmge qatysty jınalystar ótedi. Qazir Astana men Almaty qalalary arqyly vızasyz 72 saǵat bolý rejimin Qytaı men Úndistanǵa engizdik. Mádenı nysandar boıynsha jaǵdaı sál basqasha, «Astana Opera» júktemesi 100 paıyzǵa, «Astana balet» júktemesi 100 paıyzǵa jetip otyr. Nursultan Ábishuly, Jańa jyldyń aldynda «Şelkýnchıkti» biz kúnine eki ret qoıdyq», - dedi mınıstr.

Onyń dereginshe, Astanaǵa mádenı nysandar tipti, jetispeı jatyr. Máselen, Ulttyq mýzeıge 2016 jyly 166 myń adam barsa, 2017 jyly 1,5 mln adamǵa jetken. 

Bas qaladaǵy mádenı ahýaldy toqtaýsyz baıandaı jónelgen Muhamedıulyna Elbasy: «Suraq qoıam dep pálege qalasyń ǵoı endi», - dep ázildedi.