Elbasy metallýrgterdi kásibı merekemen quttyqtady

NUR-SULTAN. QazAqparat - Qazaqstannyń Tuńǵysh Prezıdenti – Elbasy Nursultan Nazarbaev Metallýrgterdi kásibı merekelerimen quttyqtady, dep habarlaıdy QazAqparat Elbasynyń resmı saıtyna silteme jasap.

«Qurmetti metallýrgııa salasynyń eńbekkerleri men ardagerleri!

Sizderdi kásibı merekelerińiz – Metallýrg kúnimen quttyqtaımyn!

Osy ataýly kúni biz metallýrgtarǵa – erlik pen zor qaırat-jigerdi talap etetin mamandyq ıelerine, ózderiniń abyroıly da aýyr jumysyna berilgen eńbeksúıgish jandarǵa syı-qurmet kórsetemiz.

Meniń ózim de domna peshi basyndaǵy eńbekte shyńdalyp, tájirıbe jınaqtadym. Jumylǵan judyryqtaı uıymshyldyqtyń, ózara kómek pen naǵyz dostyqtyń shyn baǵasyn bildim.

Metallýrgııa – qazaqstandyq ónerkásiptiń jetekshi salasynyń biri, onda myńdaǵan joǵary bilikti mamandar men basqarýshylar eńbek etedi. Olardyń qajyrly eńbegi men asqan sheberligi elimizdiń ekonomıkalyq ál-aýqatynyń berik negiziniń biri bolyp otyr.

Sizder aldaǵy ýaqytta da Qazaqstannyń ıgiligi jolyndaǵy óz jumystaryńyzdyń barysynda kásibı jańa bıikterdi baǵyndyra beresizder dep senemin.

Barshańyzǵa myqty densaýlyq, tabys, baq-bereke tileımin!»,-delingen quttyqtaýda.

Aıta keteıik, Qazaqstanda metallýrgter kúni shilde aıynyń úshinshi jeksenbisinde, ıaǵnı osy jeksenbi atalyp ótedi.