Elbasy mektepterdi jańa qurylǵylarmen qamtý boıynsha ákimderge tapsyrma berdi

ASTANA. QazAqparat - Memleket basshysy Nursultan Nazarbaev oblys ákimderine barlyq mektepterdi Nazarbaev Zııatkerlik mektebi standarty qurylǵylarymen qamtýdy tapsyrdy, dep habarlaıdy QazAqparat tilshisi.

«Bilim salasynda muǵalimderdiń jumys jaıy jaqsaryp, olardyń aılyq eńbekaqysy artyp keledi. Aılyqtarynyń mólsheri 30 paıyzǵa artty. Tipti biliktiligin arttyrǵandardyń jalaqysy 50 paıyzǵa kóterildi ǵoı, ıá Erlan (Saǵadıev)?», - dedi Memleket basshysy Bilim jáne ǵylym mınıstrine qarata aıtqan sózinde.

Erlan Saǵadıev óz jaýabynda 200 myń muǵalimniń aılyǵy 30 paıyzǵa, taǵy 34 myń muǵalimniń 50 paıyzǵa artqanyn baıan etti.

«Mine, kórdińizder me? Bul muǵalimder úshin jaqsy ǵoı. Sol sekildi JOO-lar avtonomııa aldy. Mektepke deıin bilim berý salasynyń aýqymy keńeıip keledi. Ótken jyly elimizde 70 mektep salynǵan. Oqý baǵdarlamasy jańarýda. Máselen, Danıal Kenjetaıuly (ShQO ákimi)-Shyǵys Qazaqstanda 277 mektep NZM standarttary boıynsha qurylǵylarmen qamtylǵanyn baıandady. Al basqalary nelikten bul sharýany atqara almaıdy? Jergilikti bıýdjettiń esebinen bul mektepterde birden bilim sapasy arta túsken. Ákimderge atalǵan úlgi boıynsha jumys júrgizýdi tapsyramyn. Aımaqtarda adamdar razy bolýy kerek. Barlyq mektepterdi ınternetpen, kólik quralymen qamtý kerek», - dedi Nursultan Nazarbaev.

Eske sala ketsek, Úkimet úıinde QR Prezıdenti Nursultan Nazarbaevtyń tóraǵalyǵymen Úkimettiń keńeıtilgen quramdaǵy otyrysy ótip jatyr. Elbasynyń qatysýymen Úkimettiń mundaı otyrysy jyl basynda turaqty túrde ótkizilip keledi. Búgingi jıynǵa Úkimet músheleri, Astana, Almaty jáne Shymkent qalalary men oblystardyń ákimderi, ortalyq memlekettik organdar men mınıstrler qatysýda.