Elbasy: Mekteptegi aıaǵy joq reformalarǵa sońǵy sheshim jasalady

ASTANA. QazAqparat - Balalardy suranysy bar mamandyqtarǵa baǵyttaý kerek. Bul týraly Elbasy Nursultan Nazarbaev Qazaqstan halqyna arnalǵan Joldaýynda málim etti, dep habarlaıdy QazAqparat.

«Orta bilim júıesinde negizgi qadamdar aıqyndaldy. Endi olardyń oryndalýyna ekpin qoıý kerek. Nazarbaev Zııatkerlik mektepteriniń oqytý ádisi men júıesi memlekettik mektepter úshin biryńǵaı standart bolýy tıis. Bul rette, oqytý standarttaryn aıtyp turmyn. Osy oraıda mekteptegi bilim berý salasyndaǵy aıaǵy joq reformalarǵa sońǵy sheshim bolady», - dedi Prezıdent.

Osy oraıda Memleket basshysy Nazarbaev Zııatkerlik mektepteri óziniń tıimdiligin kórsete alǵandyǵyn atap ótti.

«Bul oqý oryndarynda oqytý ádistemesi óte durys, halyqaralyq negizde jasalǵan. Orta bilimnen  bastap kásiptik dıagnostıkany júrgizip, balalardy suranysy bar mamandyqtarǵa baǵyttaý kerek», - dedi Elbasy.

Aıta keteıik, Elbasy bıylǵy Joldaýynda 2019 jyly «Pedagogtardyń mártebesi» týraly Zań qabyldanatynyn aıtty.