«Elbasy medali» jobasyna qatysýshylar saıası qýǵyn-súrgin qurbandaryn eske aldy
Jobaǵa qatysýshy astanalyqtar Otanǵa opasyzdyq jasaǵandardyń áıelderiniń Aqmola lagerine bardy. Al Qaraǵandy oblysynda balalar Dolınka kentindegi Saıası qýǵyn-súrgin qurbandaryn eske alý murajaıyn aralady.
«Bir kezderi bul qaıǵyly oqıǵalar meniń otbasyma da áser etti. Meniń ata-babalarym jat jerge qashýǵa májbúr boldy. Jol-jónekeı otbasynyń birshama múshesinen aıyrylǵan atam ne bolsa da aman qaldy. Menińshe, ulttyq sana turǵysynan bul óte mańyzdy kún. Biz halqymyzdyń ótkenin bilip, este saqtaýymyz kerek, qaza tapqan batyrlardy eske alyp, táýelsizdigimizdi baǵalaýymyz kerek», - dedi «Elbasy medali» jobasyna qatysýshy Aqnur Tuıaqbaı
Almaty men Shymkentte jobanyń 100-den astam qatysýshysy 1931-1933 jyldardaǵy asharshylyq qurbandary eskertkishine (Almaty qalasy) jáne «Ana men bala» monýmentine (Shymkent qalasy) gúl shoqtaryn qoıdy.
«Men úshin bul óte mańyzdy jáne áserli kún. Meniń atamdy GÝLAG-qa alyp ketpek bolǵan. Jaqyn týysyńdy alyp ketýi múmkin ekenin jáne sol kezde otbasymyzdyń qandaı kúı keshetinin oılaýdyń ózi qorqynyshty. Meni jınalǵan balalardyń aqyldylyǵy tań qaldyrdy, olardyń barlyǵy oqıǵany qyzyǵa tyńdady. Mundaı sharaǵa men alǵash ret qatysyp otyrmyn», - deıdi jobanyń 16 jastaǵy qatysýshysy Darıa Ivanova.
Sondaı-aq, Pavlodar, Túrkistan, Atyraý, Aqtaý, Semeı, Qostanaı jáne t.b. qalalarda repressııa kezindegi tarıhı oqıǵalar jaıly tanystyrý dáristeri ótti. Іs-sharalarǵa qatysqandardyń jalpy sany 1,5 myń adamnan asady. Barlyq is-sharalar sanıtarlyq-epıdemıologııalyq normalardy saqtaı otyryp uıymdastyryldy.
«Shynymdy aıtsam, osy kúnge deıin Shymkentte saıası qýǵyn-súrgin qurbandaryna arnalǵan eskertkish bar ekenin bilmeppin. Sharaǵa deıin osy kezeń tarıhyn tolyǵyraq zertteı bastadym jáne ol maǵan qatty áser etti. Elimizdiń jastary ashtyq pen jappaı qýǵyn-súrgin, qýdalaý jáne kinásiz adamdardy kúshtep deportatsııalaýdyń saldaryn biletinine jáne umytpaǵanyna rıza boldym», - dedi Shymkent qalasynyń turǵyny Beıbarys Júsipbekov.