Elbasy: Mashına qurylysy Qazaqstannyń ındýstrııalyq damýynyń kelesi kezeńiniń lokomotıvi bolýy tıis
Prezıdenttiń quttyqtaý sózin QR Premer-Mınıstri Kárim Másimov oqyp berdi. «Sońǵy tórt jylda Qazaqstannyń mashına jasaý salasy turaqty ósimniń qarqynyn kórsetip otyr. Indýstrııalandyrýdyń birinshi besjyldyǵyn júzege asyrý kezeńinde salada óndiris kólemi eki eseden astam kórsetkishke artty», - degen Memleket basshysy. Osy oraıda Prezıdent lokomotıv, jolaýshylar poıyzdarynyń óndirisi, avtokólik, avtobýstar, júk mashınalarynyń shyǵarý, sondaı-aq energetıkalyq saladaǵy mashına jasaý sekildi baǵyttar damyp kele jatqandyǵyn atap ótti. Sonymen qatar, Elbasy óz sózinde birlesken óndiristi qurý arqyly Qazaqstanda álemdik aldyńǵy qatarly kompanııalar sátti jumys istep jatqandyǵyna toqtaldy. Prezıdent búginde birqatar tanymal brendter Qazaqstanda jańa jobalardy júzege asyrý týraly sheshim qabyldaý satysynda turǵandyǵyn aıta kele, bul óz kezeginde ınvestorlar tarapynan el ekonomıkasynyń bolashaǵyna úlken senimin baıqatyp otyrǵandyǵyn jetkizdi. «Investıtsııalar týraly» Zańǵa túzetýlerge baılanysty Úkimet áleýetti ınvestorlarmen júıeli jumystardy atqarýda jáne jaqyn bolashaqta jańa jobalar boıynsha ınvestıtsııalyq kelisimderdi bekitýdiń kýágeri bolatynymyzǵa úmittimiz. 2015 jyldan bastap 2019 jylǵa deıin biz Indýstrııalyq-ınnovatsııalyq damý memlekettik baǵdarlamasyn tájirıbe júzinde júzege asyrýǵa kirisemiz. Osy baǵdarlamadaǵy basymdyqty 14 salanyń 6-aýy mashına jasaý salasyna qatysty. Mashına qurylysy Qazaqstannyń ındýstrııalyq damýynyń kelesi aınalymynyń lokomotıvi bolýy tıis», - delingen Memleket basshysynyń sózinde. Osy oraıda Elbasy salany órkendetýge memleket aıryqsha mán berip otarǵandyǵyn qadap aıtty. -0-