Elbasy: Malaızııa Premer-Mınıstriniń Qazaqstanǵa sapary eki eldiń yntymaqtastyǵyna jańa serpin beredi

ASTANA. QazAqparat - Malaızııa tájirıbesine elimizdiń jastaryn oqytýǵa múddelimiz. Bul týraly búgin Aqordada Malaızııa Premer-Mınıstri Nadjıb Razakpen bolǵan kelissózden keıingi birlesken málimdeme barysynda Elbasy Nursultan Nazarbaev málim etti.

«Eki eldiń damýy men órkendeý tarıhy uqsas. Kóp ulttylyǵy, ishki máselelerdi sheshýi, syrtqy qarym-qatynasy óte uqsas bolyp keledi. Sonymen qatar ekonomıkamyzda da uqsastyǵymyz bar. Sondyqtan yntymaqtastyqty damytýǵa, Malaızııanyń tájirıbesin úırenýge, sheneýnikter men jastardy Malaızııada oqytýǵa biz múddelimiz», - dep toqtaldy N.Nazarbaev.

Munymen qosa Memleket basshysy eki eldiń arasyndaǵy bolashaqtaǵy qarym-qatynastar jóninde keńinen pikir almasý bolǵanyn, sondaı-aq dúnıejúzindegi ahýal jaǵdaıy talqylanǵanyn jetkizdi.

«Malaızııa Premer-Mınıstriniń osy sapary eki eldiń arasyndaǵy qarym-qatynasqa jańadan jol ashyp, jańa deńgeıge kóteredi dep senemin», - túıdi Prezıdent.